अन्तर्राष्ट्रिय समाचार निकाय(एजेन्सी) ‘रोयटर्स’ का अनुसार इरानका नयाँ सर्वोच्च नेता मोजताबा खामेनीले आफ्नो देशमा रहेको ‘युरेनियम’ को भण्डारलाई देश बाहिर लैजान रोक लगाएका छन्। 

इरानका दुई जना उच्च सरकारी अधिकारीहरूले यो कुराको पुष्टि गरेका हुन्।

विशेषज्ञहरूका अनुसार इरानसँग अहिले करिब ९०० पाउन्ड (४०० केजीभन्दा बढी) परिष्कृत युरेनियम छ। 

यसलाई थोरै मात्र थप प्रशोधन गरेमा सजिलै परमाणु बम वा आणविक हतियार बनाउन सकिन्छ। अमेरिकी राष्ट्रपति डोनल्ड ट्रम्पले यसलाई “आणविक धुलो” (न्यूक्लियर डस्ट) भन्ने गरेका छन्।

यो बहुमूल्य धातु सन् २०२५ को जुन महिनामा अमेरिका र इजरायलले गरेको हवाई आक्रमणबाट क्षतिग्रस्त भएको इरानको एउटा भूमिगत आणविक केन्द्र भित्र सुरक्षित रूपमा पुरिएर रहेको विश्वास गरिएको छ।

युद्ध सुरु भएदेखि इरानका यी नयाँ नेता खामेनी सार्वजनिक रूपमा देखा परेका छैनन्। तर, त्यहाँका सरकारी सञ्चार माध्यमहरूले उनको तर्फबाट विभिन्न आदेश र भनाइहरू सार्वजनिक गर्दै आएका छन्।

 सिविएसन्यूजका अनुसार उनको यो नयाँ निर्णयले अमेरिका र इरानबीच भइरहेको शान्ति वार्तालाई ठूलो धक्का पुऱ्याएको छ। अमेरिकाले युद्ध रोक्न र शान्ति सम्झौता गर्नका लागि इरानले आफ्नो युरेनियम देश बाहिर पठाउनुपर्ने मुख्य सर्त राखेको थियो।

अमेरिकी राष्ट्रपति ट्रम्पले इरानलाई आणविक हतियार बनाउन नदिनु नै यो युद्धको मुख्य उद्देश्य भएको बताउँदै आएका छन्। उनले इरान यो युरेनियम बुझाउन सहमत भइसकेको वा अमेरिकी सेनाले बल प्रयोग गरेर पनि यसलाई नियन्त्रणमा लिने दाबी गर्दै आएका थिए। 

अर्कोतर्फ, इजरायलका प्रधानमन्त्री बेन्जामिन नेतन्याहुले पनि युद्ध अन्त्य गर्न इरानको युरेनियम हटाउनै पर्ने अडान राखेका छन्। तर राष्ट्रपति ट्रम्पले बुधबार पत्रकारहरूसँग कुरा गर्दै नेतन्याहुले इरानको मामिलामा आफूले भनेकै कुरा मान्ने दाबी गरे।

इरानका उच्च अधिकारीहरूका अनुसार यदि उनीहरूले यो युरेनियम देश बाहिर पठाएमा इरान झन् कमजोर हुनेछ र अमेरिका तथा इजरायलले भविष्यमा फेरि ठूलो आक्रमण गर्न सक्ने डर उनीहरूमा छ। 

त्यसैले आफ्नो सुरक्षाका लागि यो धातु देश बाहिर नपठाउने अडान इरानले लिएको हो।