अमेरिकाको क्यालिफोर्निया राज्यको जङ्गलमा लागेको भीषण डढेलो बस्तीतिर सल्किएपछि त्यहाँका १७ हजारभन्दा बढी मानिसहरूलाई सुरक्षित ठाउँमा जान आदेश दिइएको छ। ‘स्यान्डी फायर’ नाम दिइएको यो डढेलो सोमबार लस एन्जलस शहरभन्दा केही टाढा रहेको सिमी भ्यालीका पहाडहरूबाट सुरु भएको थियो।

मङ्गलबार बिहानसम्ममा यो आगोले २ वर्ग माइलभन्दा बढी क्षेत्रको सुक्खा झाडीहरू जलाएर खरानी बनाइसकेको छ। भेन्टुरा काउन्टी अग्नि नियन्त्रण विभागका अनुसार आगोका कारण अहिलेसम्म कम्तीमा एउटा घर पूर्ण रूपमा ध्वस्त भइसकेको छ।

सुरुमा प्रतिघन्टा ३० माइलको तीव्र गतिमा चलेको हावाका कारण आगो जङ्गलभरि निकै छिटो फैलिएको थियो। तर, रातको समयमा हावाको गति केही कम भएपछि आगो निभाउने टोलीलाई केही सजिलो भएको छ।

अग्नि नियन्त्रण विभागका प्रवक्ता एन्ड्रु डाउडका अनुसार मौसममा सुधार आएपछि आगो निभाउने काममा धेरै प्रगति भएको छ। फेरि हावा चल्नुभन्दा अगाडि नै आगोलाई नियन्त्रणमा लिने प्रयास भइरहेको छ। अहिलेसम्म आगो ५ प्रतिशत मात्र नियन्त्रणमा आएको छ र यो कसरी लाग्यो भन्नेबारे अनुसन्धान भइरहेको छ।

एपीका अनुसार अहिले झन्डै १ लाख २५ हजार मानिस बस्ने सिमी भ्याली शहर पूरै धुवाँले ढाकिएको छ। आगो निभाउनका लागि उदग्रबिमान (हेलिकप्टर) र हवाइजहाजबाट पानी खसाल्ने काम भइरहेको छ।

यसैबीच, क्यालिफोर्नियाकै समुन्द्र नजिकै रहेको सान्ता रोजा टापुमा पनि अर्को ठूलो डढेलो लागेको छ। उक्त आगो २३ वर्ग माइल क्षेत्रमा फैलिएको छ। आगोले त्यहाँका केही भवनहरू नष्ट गरेपछि राष्ट्रिय निकुञ्ज का ११ जना कर्मचारीहरू ज्यान जोगाउन त्यहाँबाट भागेका छन्।

सान्टा रोजा टापु घुम्न र क्याम्पिङ गर्नका लागि निकै प्रसिद्ध ठाउँ हो, जहाँ विभिन्न प्रजातिका फ्याउरो, फोहोर खाने जीव र समुद्री जीवहरू बस्ने गर्छन्। त्यहाँको आगो अहिलेसम्म नियन्त्रणमा आउन नसकेको जनाईएको छ ।