अमेरिकाको क्यालिफोर्निया राज्य अन्तर्गत सान डिएगो शहरमा गत सोमबार त्यहाँको सबैभन्दा ठूलो मस्जिदमा अन्धाधुन्ध गोली प्रहार गर्दा तीन जना निर्दोषहरुको ज्यान गएको छ ।

प्रहरीका अनुसार ज्यान गुमाउनेहरूमध्ये एक जना सुरक्षाकर्मी जो आठ वटा छोराछोरीका बुबा र आफ्नो समुदायका निकै प्यारा मानिस थिए।

यो आक्रमण लगत्तै, मस्जिद नजिकै अडान गरि राखिएको क्षेत्रमा एउटा कारभित्र दुई जना किशोरहरू मृत अवस्थामा फेला परेका छन्। प्रहरीका अनुसार उनीहरूले आफैंलाई गोली हानेर आत्महत्या गरेका हुन्। सिएनएनले उल्लेख गरे अनुसार तीमध्ये एकजना १७ वर्षका ‘केन क्लार्क’ रहेका छन्।

प्रहरीले यस घटनालाई ‘हेट क्राइम’ अर्थात् कुनै निश्चित समुदायप्रति घृणा फैलाउने उद्देश्यले गरिएको अपराधको रूपमा अनुसन्धान गरिरहेको छ।

आक्रमणकारीहरूले हतियारमा घृणा फैलाउने शब्दहरू लेखेका थिए भने उनीहरूले छोडेको एउटा ‘सुसाइड नोट’ (आत्महत्या अघि लेखिएको पत्र) मा जातीय अहंकारका कुराहरू लेखिएको फेला परेको छ।

यो भयानक घटना हुनुभन्दा केही घण्टा अगाडि मात्रै मुख्य आरोपी केन क्लार्ककी आमाले प्रहरीलाई दूरभाष गरेर आफ्नो छोरा, कार र घरमा राखिएका तीनवटा हतियार हराएको जानकारी दिएकी थिइन्।

उनले आफ्नो छोरा निकै तनावमा रहेको र अर्का एक जना साथीसँग सैन्य पोशाक (क्यामफ्लाज) लगाएर हिँडेको बताएकी थिइन्। घरबाट हतियार गायब भएको थाहा पाएपछि प्रहरीले ती किशोरहरू समाजका लागि खतरा बन्न सक्ने अनुमान गरेको थियो, तर उनीहरूलाई रोक्न नपाउँदै यो दुखद घटना घटिसकेको थियो।

अनुसन्धानका क्रममा आक्रमणकारी क्लार्क पहिले एउटा विद्यालयको रेस्लिङ (कुस्ती) टोलीमा आबद्ध रहेको र उनका साथीहरूले कहिल्यै पनि उनमा यस्तो हिंस्रक स्वभाव नदेखेको बताएका छन्। क्लार्कका हजुरबुबा र हजुरआमाले यो घटनाबाट आफूहरू स्तब्ध भएको र घाइते तथा मृतकका परिवारसँग माफी मागेका छन्।

अहिले अमेरिकी संघीय अनुसन्धान ब्युरो (एफबिआइ ) र सरकारी वकिलहरूले यस घटनामा अन्य कसैको हात छ कि भनी सुक्ष्म अनुसन्धान गरिरहेका छन्। सन् २०२३ मा गाजा युद्ध सुरु भएदेखि अमेरिकामा मुसलमान समुदायविरुद्ध हुने घृणा र भेदभावका घटनाहरू निकै बढेका छन्।

तथ्याङ्क अनुसार गत वर्ष मात्रै मुस्लिम समुदायमाथि भएका दुर्व्यवहारका ८ हजार ६ सयभन्दा बढी उजुरीहरू दर्ता भएका थिए, जुन अहिलेसम्मकै सबैभन्दा धेरै हो।