अमेरिकी केन्द्रीय कमाण्डका अनुसार, बुधबार हर्मुज जलडमरू नजिकैको क्षेत्रीय समुद्री इलाकामा अमेरिकी वायुसेनाको अत्याधुनिक ‘एफ-३५ ए’ स्टिल्थ लडाकु विमानले गस्ती गरेको छ। यो विमान निकै आधुनिक र शक्तिशाली मानिन्छ।

यो विमान पाँचौँ पुस्ताको सबैभन्दा आधुनिक लडाकु विमान हो। यसको विशेषता भनेको यसले करिब १८ हजार पाउण्ड बराबरका ठूला हतियार र क्षेप्यास्त्र हरू बोकेर पनि आवाजभन्दा तीव्र गतिमा उड्न सक्छ। यसलाई शत्रुको राडारले सजिलै पत्ता लगाउन सक्दैन, त्यसैले यसलाई ‘स्टिल्थ फाइटर’ भनिन्छ।

इरानले हर्मुज जलडमरूमा आफ्नो पकड बलियो बनाउँदै लगेको छ। यो समुद्री मार्ग संसारभरिको इन्धन (तेल र ग्यास) ढुवानीका लागि सबैभन्दा महत्त्वपूर्ण बाटो हो। इरानले यो बाटोमा अवरोध सिर्जना गरेपछि विश्वभर इन्धनको अभाव हुन थालेको छ र यसले विश्वकै अर्थतन्त्रमा नराम्रो असर पारेको छ।

यसै कारण, अमेरिकाले अप्रिल १३ देखि नै यस समुद्री क्षेत्रमा कडा नाकाबन्दी सुरु गरेको छ। यस नाकाबन्दीले गर्दा तेलले भरिएका ठूला जहाजहरू (ट्याङ्करहरू) बाहिर निस्कन पाएका छैनन्। समुद्री व्यापारलाई सुरक्षित बनाउन र इरानको दबदबा कम गर्न अमेरिकाले आफ्ना सबैभन्दा शक्तिशाली युद्धक विमानहरू परिचालन गरेको हो।

यो गस्तीको जानकारी अमेरिकी सेनाले सामाजिक सञ्जाल ‘एक्स’ (पहिलेको ट्विटर) मार्फत दिएको हो।