बुधबार अमेरिकी सेनाले ओमानको खाडीमा एउटा इरानी तेल ट्याङ्करमाथि गोली प्रहार गरेको छ। अमेरिकी राष्ट्रपति डोनाल्ड ट्रम्पले इरानलाई युद्ध अन्त्य गर्ने सम्झौताका लागि दबाब दिइरहेका बेला यो घटना घटेको हो।

अमेरिकी सेन्ट्रल कमान्डका अनुसार, उक्त इरानी ट्याङ्करले अमेरिकाले लगाएको समुद्री नाकाबन्दी तोड्न खोजेको थियो। त्यसै क्रममा अमेरिकी लडाकु विमानले ट्याङ्करको ‘रडर’ (जहाज मोड्ने भाग) मा निशाना बनाएर गोली हानेको थियो। यो आक्रमणको उद्देश्य जहाजलाई अगाडि बढ्नबाट रोक्नु हो ।

इरान र अमेरिकाबीच आधिकारिक रूपमा युद्धविराम चलिरहेको बेला यो आक्रमण भएको हो ।

दुवै देश युद्ध अन्त्य गर्ने एउटा प्रारम्भिक सम्झौताको नजिक पुगेको जस्तो देखिएका थिए। तर, राष्ट्रपति ट्रम्पले इरानलाई नयाँ चेतावनी दिएका छन्। उनले यदि विश्वका लागि महत्वपूर्ण ‘हर्मुज जलडमरु’ खोल्ने विषयमा सम्झौता भएन भने इरानमाथि फेरि ठूलो बमबारी सुरु गर्ने धम्की दिएका छन्।

ट्रम्पले सामाजिक सञ्जालमा लेख्दै विगत दुई महिनादेखि चलिरहेको यो युद्ध छिट्टै समाप्त हुन सक्ने आशा पनि व्यक्त गरेका छन्। उनले युद्धका कारण रोकिएको तेल र ग्याँसको ढुवानी फेरि सुरु हुन सक्ने बताएका छन्। तर, यो सबै कुरा इरानले प्रस्तावित सम्झौता मान्छ कि मान्दैन भन्ने कुरामा भर पर्नेछ।

ट्रम्पले कडा शब्दमा लेखेका छन्, “यदि उनीहरू सहमत भएनन् भने बमबारी सुरु हुनेछ।”