अमेरिकी राष्ट्रपति डोनाल्ड ट्रम्प र प्रथम महिला मेलानिया ट्रम्पले बेलायतका राजा चार्ल्स तृतीय र रानी क्यामिलालाई ह्वाइट हाउसमा एक विशेष रात्रीभोजमार्फत भव्य स्वागत गरे। मंगलबार साँझ ह्वाइट हाउसको पूर्वीय कक्ष अर्थात् ‘इस्ट रुम’ मा आयोजित यस भोजमा दुई देशबीचको पुरानो र बलियो मित्रताको चर्चा गरियो।

भोजको सुरुवात गर्दै राष्ट्रपति ट्रम्पले राजा चार्ल्सको निकै प्रशंसा गरे। उनले ठट्टा गर्दै भने, “राजा चार्ल्सले अमेरिकी संसद्‌मा भाषण गर्दा विपक्षी डेमोक्र्याट सदस्यहरूलाई पनि सम्मानमा उभिन बाध्य पार्नुभयो, जुन मैले कहिल्यै गर्न सकेको थिइनँ।” ट्रम्पले अमेरिका र बेलायतको सम्बन्धलाई “अत्यन्तै विशेष र अद्भुत मित्रता” को संज्ञा दिए।

आफ्नो मन्तव्यको सुरुमा राजा चार्ल्सले गत शनिबार ह्वाइट हाउसको एक कार्यक्रममा भएको गोलीकाण्डको घटनालाई सम्झिए। उनले राष्ट्रपति ट्रम्पको साहसको प्रशंसा गर्दै उक्त घटनामा सुरक्षाकर्मीहरूले देखाएको तदारुकताको कदर गरे। उनले उक्त डरलाग्दो घटनाप्रति सहानुभूति प्रकट गर्दै आफू र बेलायती जनता अमेरिकीहरूको साथमा रहेको बताए।

भोजका क्रममा केही रमाइला र ठट्टापूर्ण कुराकानी पनि भए। राजा चार्ल्सले सन् १८१२ को युद्धको प्रसङ्ग निकाल्दै ठट्टा गरे। उनले ह्वाइट हाउसमा भइरहेको नयाँ निर्माण कार्यलाई सन् १८१४ मा बेलायतीहरूले ह्वाइट हाउस जलाएको घटनासँग जोडेर ठट्टा गर्दा हलमा हाँसो छाएको थियो।

कार्यक्रमको अन्त्यमा राजा चार्ल्सले राष्ट्रपति ट्रम्पलाई एक विशेष ऐतिहासिक उपहार प्रदान गरे। उनले दोस्रो विश्वयुद्धका बेला प्रयोग भएको बेलायती जहाज ‘एचएमएस ट्रम्प’ को घण्टी ट्रम्पलाई उपहार स्वरूप दिएका थिए।