इरानका विदेशमन्त्री अब्बास अराघची पाकिस्तानको राजधानी इस्लामावादबाट रुसतर्फ प्रस्थान गरेका छन् ।

इरानी सञ्चारमाध्यमहरूका अनुसार उनि सोमबार रुसी राष्ट्रपति भ्लादिमिर पुटिनसँग भेटघाट गर्न मस्को जाँदै छन् ।

मस्कोका लागि इरानी राजदूतका अनुसार विदेशमन्त्री अराघचीले रुसी अधिकारीहरूसँग पछिल्लो समय भइरहेका शान्ति वार्ता, युद्धविरामको अवस्था र क्षेत्रीय विकासका बारेमा गम्भीर छलफल गर्ने छन् । इरान र रुसबीचको यो भेटलाई अहिलेको तनावपूर्ण स्थितिमा निकै महत्त्वपूर्ण मानिएको छ।

यो भ्रमण अगाडि अराघचीले ४८ घण्टाभित्र दुई पटक पाकिस्तानको भ्रमण गरेका छन् । उनले पाकिस्तानमा रहेर विभिन्न उच्च अधिकारीहरूसँग भेटघाट गरेका थिए ।

सुरुमा इरान र अमेरिकाबीच प्रत्यक्ष वार्ता हुने आशा गरिएको भए पनि, त्यो सम्भावना तत्कालका लागि कम हुँदै गएपछि उनि रुसतर्फ लागेका हुन् ।

इरानी विदेशमन्त्रीको बिदाइपछि पाकिस्तानका लागि इरानी राजदूत रेजा अमिरी मोघदमले पाकिस्तानी नेतृत्वलाई धन्यवाद दिएका छन् । उनले क्षेत्रमा शान्ति स्थापना गर्न र तनाव अन्त्य गर्न पाकिस्तानले गरेको “अथक प्रयास” को उच्च प्रशंसा गरे ।

यस भ्रमणले इरानले अहिलेको संकट समाधानका लागि आफ्ना छिमेकी र मित्र राष्ट्रहरूसँगको कुटनीतिक सम्बन्धलाई कति प्राथमिकता दिएको छ भन्ने कुरा प्रष्ट पारेको छ ।

मस्कोमा हुने वार्ताले आगामी दिनमा युद्धविराम र शान्तिको दिशामा नयाँ मोड ल्याउन सक्ने अपेक्षा गरिएको छ।