गत सोमबार बाल्टिक सागरमाथि रुसी सैन्य विमानहरू उडिरहेका बेला नेटोका सशस्त्र लडाकु विमानहरूले तिनीहरूलाई रोकेका छन्। 

रुसले आफ्ना दुईवटा ठूला र शक्तिशाली टियू- २२एम३बमवर्षक विमानहरू र १० वटा लडाकु विमानहरू बाल्टिक सागरको आकाशमा पठाएको थियो। 

यी विमानहरूले करिब चार घण्टासम्म उडान भरेका थिए। 

रुसी रक्षा मन्त्रालयका अनुसार यो उडान पहिले नै तय गरिएको थियो र उनीहरूले कुनै पनि देशको सीमा मिचेका थिएनन्, बरु तटस्थ पानीमाथि उडेका थिए।

रुसी विमानहरू उडेपछि नेटोका सदस्य राष्ट्रहरू तुरुन्तै सक्रिय भए। लिथुआनियामा तैनाथ फ्रान्सेली ‘राफायल’ लडाकु विमानहरू आकाशमा पुगे। यी विमानहरूमा हावाबाट हावामा प्रहार गर्ने क्षेप्यास्त्रहरु जडान गरिएका थिए। फ्रान्सका साथसाथै स्वीडेन, फिनल्याण्ड, पोल्याण्ड, डेनमार्क र रोमानियाका लडाकु विमानहरू पनि आकाशमा उत्रिएका थिए।

यी सबै देशका विमानहरूले रुसी विमानहरूको निगरानी गरे र उनीहरूलाई बाटोबाट टाढै राख्न मद्दत गरे। 

नेटोले दशकौंदेखि यस क्षेत्रमा ‘एयर-पोलिसिङ’ अर्थात् आकाशमा गस्ती गर्ने काम गर्दै आएको छ ।

रुसी विमानहरूलाई नेटोका धेरै देशका लडाकु विमानहरूले घेरेर निगरानी गर्नुले नेटो आफ्नो क्षेत्रको रक्षाका लागि कति सतर्क छ भन्ने देखाउँछ।

यद्यपि, रुसले यो आफ्नो नियमित तालिम मात्र भएको बताएको छ।