भेनेजुएलामा हालै भएको एक ठूलो अमेरिकी सैन्य कारबाहीका कारण अन्तर्राष्ट्रिय राजनीतिमा हलचल मच्चिएको छ। क्युबाको कम्युनिष्ट पार्टी(साम्यवादी दल)ले आइतबार एक विज्ञप्ति जारी गर्दै उक्त कारबाहीमा कम्तीमा ३२ जना क्युबाली नागरिक मारिएको दाबी गरेको छ।

क्युबाका अनुसार ती व्यक्तिहरू भेनेजुएला सरकारको आग्रहमा त्यहाँ विशेष सैन्य र सुरक्षा मिशनमा खटिएका थिए।

अर्कोतर्फ, भेनेजुएलाका विपक्षी नेता एडमन्डो गोन्जालेज उरुटियाले अमेरिकी सेनाले राष्ट्रपति निकोलस मादुरोलाई पक्राउ गरेको घटनालाई देशको इतिहासमा एउटा ‘महत्वपूर्ण मोड’ भनेका छन्। उनले भने, “यो एउटा ठूलो कदम हो, तर यति मात्र पर्याप्त छैन।”

एबिसीन्यूजका अनुसार नेता गोन्जालेजले आफूलाई देशको वास्तविक राष्ट्रपतिको रूपमा प्रस्तुत गर्दै सन् २०२४ को चुनावको नतिजालाई सम्मान गर्न सेना र सुरक्षा निकायलाई आग्रह गरेका छन्। उनले सेनालाई संविधान र जनताप्रति वफादार रहन पनि अपिल गरेका छन्।

अहिले भेनेजुएलामा निकै तनावपूर्ण वातावरण छ। एकातिर क्युबाले आफ्ना नागरिक मारिएकोमा दुःख व्यक्त गरिरहेको छ भने अर्कोतिर विपक्षीहरूले अब नयाँ सरकार बन्ने आशा गरिरहेका छन्।