अमेरिकी सेनाले सोमबार पूर्वी प्रशान्त महासागरमा लागू औषध ओसारपसार गरिरहेको आरोपमा एउटा डुङ्गामाथि हवाई हमला गरेको छ। यस कारबाहीमा दुई जनाको मृत्यु भएको छ। अमेरिकाले ती व्यक्तिहरूलाई ‘नार्को-आतंकवादी’ (लागुऔषध कारोबारमा संलग्न आतंकवादी) भनेको छ।

गत सेप्टेम्बरदेखि अहिलेसम्म अमेरिकी सेनाले यस क्षेत्रमा ३० वटा यस्ता डुङ्गाहरूमाथि हमला गरिसकेको छ, जसमा परी १०७ जनाले ज्यान गुमाएका छन्। राष्ट्रपति ट्रम्पले लागुऔषध ओसारपसार रोक्न यो कदम प्रभावकारी भएको दाबी गरेका छन्।

राष्ट्रपति ट्रम्पका अनुसार अमेरिकी सेनाले लागुऔषध लोड गर्ने एउटा ठूलो अड्डामा समेत बमबारी गरेको छ। यो अड्डा भेनेजुएलामा रहेको अनुमान गरिएको छ।
यी हमलाहरूलाई लिएर अमेरिकाभित्र र बाहिर विवाद सुरु भएको छ। कतिपय नेताहरूले संसदको अनुमति बिना यस्तो सैन्य कारबाही गर्नु गैरकानुनी भएको बताएका छन्। कोलम्बिया र भेनेजुएलाका सरकारले पनि यसको कडा आलोचना गरेका छन्।

उनीहरूका अनुसार ती डुङ्गामा लागुऔषध नै थियो भन्ने पर्याप्त प्रमाण अमेरिकाले दिएको छैन। अमेरिकाले भेनेजुएलाको तेल निर्यात रोक्न समुद्री नाकाबन्दी समेत गरेको छ। अमेरिकाले भेनेजुएलाका राष्ट्रपति निकोलस मादुरोमाथि लागुऔषध तस्करहरूलाई सहयोग गरेको आरोप लगाउँदै आएको छ।