राष्ट्रपति डोनाल्ड ट्रम्पको ‘अमेरिका फस्ट’ (अमेरिका पहिलो) प्राथमिकतालाई पूर्ण रूपमा समर्थन गर्ने व्यक्तिहरूलाई नियुक्त गर्दै विदेशमा अमेरिकी कूटनीतिक उपस्थितिलाई पुनर्संरचना गर्न ट्रम्प प्रशासनले करिब ३० जना कूटनीतिज्ञहरूलाई राजदूत र अन्य वरिष्ठ पदहरूबाट फिर्ता बोलाउने भएको छ ।

रविदेश विभागका दुई अधिकारीहरूका अनुसार, कम्तीमा २९ देशका मिसन प्रमुखहरूलाई गत हप्ता नै उनीहरूको कार्यकाल जनवरीमा समाप्त हुने जानकारी दिइएको छ। 

एपिका अनुसार आन्तरिक कर्मचारी हेरफेरको बारेमा नाम गोप्य राख्ने सर्तमा ती अधिकारीहरूले यो जानकारी दिएका हुन्।

फिर्ता बोलाइएका यी सबै कूटनीतिज्ञहरूले बाइडन प्रशासनको समयमा आफ्नो पदभार ग्रहण गरेका थिए। 

ट्रम्पको दोस्रो कार्यकालको सुरुवाती महिनाहरूमा राजनीतिक नियुक्ति पाएकाहरूलाई लक्षित गरी गरिएको प्रारम्भिक हटाउने प्रक्रियाबाट उनीहरू जोगिएका थिए। तर, बुधबार वासिङ्टनका अधिकारीहरूबाट उनीहरूको तत्काल बहिर्गमनको सूचना आउन थालेपछि स्थिति परिवर्तन भएको हो।

सामान्यतया राजदूतहरू तीनदेखि चार वर्षसम्म आफ्नो पदमा रहने भए तापनि उनीहरू राष्ट्रपतिको इच्छाअनुसार पदमा बहाल रहन्छन्।

 यस हेरफेरबाट प्रभावित भएकाहरूले आफ्नो परराष्ट्र सेवा को जागिर भने गुमाउने छैनन्। 

अधिकारीहरूका अनुसार, उनीहरू वासिङ्टन फर्कनेछन् र इच्छा लागेमा अन्य जिम्मेवारीहरू लिन सक्नेछन्।