अमेरिकी गृह सुरक्षा बिभागले अवैध आप्रवासीहरूलाई आफ्नै देश फर्कन प्रोत्साहित गर्न ‘एक्जिट बोनस’ रकम १,००० डलर बाट बढाएर३,००० डलर पुर्‍याएको छ। यो सुविधा प्राप्त गर्न आप्रवासीहरूले सन् २०२५ डिसेम्बर ३१ भित्र स्वेच्छिक रूपमा अमेरिका छोड्नुपर्नेछ।

‘प्रोजेक्ट होमकमिङ’ स्वेच्छिक प्रस्थान अन्तर्गत ल्याइएको यस योजनामा सहभागी हुनेहरूले नगद लाभांशका साथै नि:शुल्क हवाई टिकट र अवैध बसाइका कारण लाग्ने विभिन्न कानुनी जरिवानामा समेत छुट पाउनेछन्।

यसका लागि सरकारले सिबीपी होम नामक नयाँ गतिशील अनुप्रयोग (स्मार्टफोन एप) सार्वजनिक गरेको छ, जहाँ आप्रवासीहरूले आफ्नो विवरण दर्ता गरी प्रस्थानको तयारी गर्न सक्छन्।

गृह सचिव क्रिस्टी नोएमले स्पष्ट चेतावनी दिँदै भनिन् ,यो अवसर सदुपयोग नगर्नेहरूलाई सुरक्षा निकायले खोजेर पक्राउ गर्नेछ र उनीहरू कहिल्यै अमेरिका फर्कन पाउने छैनन्।

सिबिएस न्यूजले बताए अनुसार ट्रम्प प्रशासनका अनुसार एकजना आप्रवासीलाई हिरासतमा राखेर जबर्जस्ती निकाला गर्दा औसत १७,००० डलर खर्च हुन्छ, जबकि स्वेच्छिक रूपमा पठाउँदा सरकारको ७० प्रतिशत खर्च कटौती हुनेछ।

सन् २०२५ को सुरुदेखि हालसम्म करिब १९ लाख मानिसले स्वेच्छिक रूपमा अमेरिका छोडिसकेका छन्। किशोर आप्रवासीहरूका लागि भने सरकारले अक्टोबरमै २,५०० को छुट्टै प्रोत्साहन संपुष्टि घोषणा गरेको थियो। यो कदमलाई ट्रम्प प्रशासनको ‘सामूहिक निकाला’ अभियानको एक नरम तर प्रभावकारी पाटोका रूपमा हेरिएको छ।