स्पेनले आइतबार युरोपेली र अरब राष्ट्रहरूको उच्चस्तरीय बैठक आयोजना गर्दै इजरायललाई गाजामा भइरहेको भीषण आक्रमण रोक्न दबाब दिन अन्तर्राष्ट्रिय प्रयास तीव्र पारेको छ।

स्पेनका विदेश मन्त्रीले गाजामा युद्ध अन्त्य गराउन अन्तर्राष्ट्रिय समुदायले इजरायलमाथि प्रतिबन्ध लगाउने विचार गर्नुपर्ने बताएका छन्। गाजामा दिनहुँ बढ्दै गएको प्यालेस्टिनी मृत्यु दर र भोकमरीका कारण मानवीय संकट गहिरिँदै गएको छ।

यो बैठक  म्याड्रिड समूहको पाँचौं औपचारिक बैठक हो, जसमा युरोपेली संघका त्यस्ता देशहरू पनि सहभागी छन्, जसलाई इजरायलले विगतमा आफ्ना नजिकका मित्र मान्दै आएको थियो। तर अहिले ती देशहरू समेत गाजामा इजरायली सेनाले बढाएको आक्रमणविरुद्ध आवाज उठाउँदै अन्तर्राष्ट्रिय दबाबमा सामेल भएका छन्।

एक साताअघि इजरायली प्रधानमन्त्री बेन्जामिन नेतन्याहुले केही सीमित राहत सामग्री गाजामा प्रवेश गर्न दिने बताएका थिए, तर त्यसयता खासै सहयोग प्रवेश गर्न सकेको छैन।

संयुक्त राष्ट्रसंघले हालसम्म गाजामा पुगेको सहयोगलाई “समुद्रमा थोपा” भनेको छ। केही राहत संस्थाहरूले नेतन्याहुको घोषणालाई “धुलो हाल्ने प्रयास” मात्र भएको टिप्पणी गरेका छन्।

स्पेनको यो प्रयासले अब गाजामा युद्धविरामका लागि ठोस अन्तर्राष्ट्रिय दबाब सिर्जना गर्ने अपेक्षा गरिएको छ।