रुसले युक्रेनमाथि युद्ध सुरु भएयताकै सबैभन्दा ठूलो ड्रोन आक्रमण गरेको युक्रेनी सेनाले आइतबार जानकारी दिएको छ। यो आक्रमण राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिन बीचको बहुप्रतीक्षित दूरभाष (टेलिफोन) वार्ता अघि भएको हो।

शनिबार राति मात्र २७३ वटा शाहीद मानव रहित यान (ड्रोन)हरू प्रक्षेपण गरिएका थिए, जसको मुख्य निशाना राजधानी कीभ क्षेत्र रह्यो। आक्रमणमा २८ वर्षीया एक महिलाको मृत्यु भयो भने ४ वर्षीय बालकसहित तीनजना घाइते भए।

सोमबार बिहान पुनः ११२ मानव रहित यान (ड्रोन) प्रहार गरिएको युक्रेनी वायु सेनाले जनाएको छ, जसले खार्किभ, सुमी, दोनेत्स्क, चेरकासी र किरोभोहराद क्षेत्रलाई लक्षित गर्‍यो। पछिल्ला हमलाहरूमा कम्तिमा दुई जनाको मृत्यु र १३ जना घाइते भएको स्थानीय अधिकारीहरूले जनाएका छन्।

यता, राष्ट्रपति ट्रम्पले सोमबार नै पुटिनसँग प्रत्यक्ष कुरा गर्ने बताएका छन्। क्रेमलिनले पनि यो कुरा पुष्टि गरेको छ। ट्रम्पले भनेका छन्, “जबसम्म म पुटिनसँग सीधा कुरा गर्दिनँ, तबसम्म शान्ति वार्तामा ठूलो प्रगति हुने देखिँदैन।”

रुसी प्रवक्ता डिमिट्री पेस्कोभले भने, “अमेरिकाले यदि शान्तिपूर्ण रूपमा हाम्रो लक्ष्य पुरा गर्न सघाउँछ भने, हामी त्यसलाई स्वागत गर्छौं।”

यता, रुसले ७५ वटा युक्रेनी मानव रहित यान (ड्रोन) खसालेको दाबी गरेको छ, जुन टास ले पुष्टि गरेको छ। फिनल्याण्डका राष्ट्रपति अलेक्जान्डर स्टबले भनेका छन्, “जेलेन्स्की धैर्यशील छन्, तर ट्रम्प अब पुटिनप्रति अधैर्य हुँदैछन्।”