संयुक्त राष्ट्र संघले इजरायल-हमास युद्धको बीचमा आसन्न अनिकालको चेतावनी दिएपछि अमेरिकाले गाजामा मानवीय सहायता पठाउने भएको छ । राष्ट्रपति जो बाइडेनले गत शुक्रबार घोषणा गर्दै मानवीय सहायता पठाउने बताए ।

“आगामी दिनहरूमा हामी जोर्डनमा हाम्रा साथीहरू र अरूसँग थप खाना र आपूर्तिहरू उपलब्ध गराउन जाँदैछौं,” बाइडेनले शुक्रबार व्हाइट हाउसको ओभल कार्यलयमा इटालीका प्रधानमन्त्रीसँगको भेट अघि भने।

यस हप्ताको सुरुमा दर्जनौं हताश प्यालेस्टाइनीहरू गाडीमा खाना लिन खोज्दा मारिएपछि अमेरिकाले मानवीय सहायताको थप मालबाहक गाडीहरुको ढुवानीको लागि इजरायललाई दबाब दिने बताए ।

गत बिहीबार गाजा शहरमा खाद्यान्न र अन्य अत्यावश्यक सहायताको लागि पर्खिरहेका प्यालेस्टिनीहरूमाथि गोली चलाएकोमा धेरै देशहरूले इजरायली सेनाको निन्दा गरेका छन्।

हमासद्वारा सञ्चालित गाजाको स्वास्थ्य मन्त्रालयले १०० भन्दा बढी व्यक्तिको मृत्यु भएको र ७५० भन्दा बढी घाइते भएको बताएको छ । बाइडेनले यसलाई अत्यन्तै “दु:खद र डरलाग्दो घटना” को संज्ञा दिएका छन् ।

“जीवन गुमाउनु हृदयविदारक हुन्छ ,” उनले भने। “मानिसहरू यति हताश छन् कि निर्दोष मानिसहरू भयानक युद्धमा फसेका छन्, आफ्नो परिवारलाई खुवाउन असमर्थ छन्। हामीले अझ धेरै गर्न आवश्यक छ। अमेरिकाले सहयोग गर्नेछ।”