काठमाडौं । सत्तारुढ जनता समाजवादी पार्टी (जसपा) फुटको संघारमा पुगेको छ । जसपा अध्यक्ष उपेन्द्र यादव र संघीय परिषद अध्यक्ष डा. बाबुराम भट्टराई पक्ष अलग्गिन सहमत भएका छन् ।

जसपाका संघीय परिषद् अध्यक्ष डा. बाबुराम भट्टराईलाई साथ दिएका निर्णायक नेताहरुले साथ छोडेपछि पार्टी फुट्ने निश्चित जस्तो भएको हो । वरिष्ठ नेता अशोक राई, संघीय सांसद मोहम्मद इस्तियाक राई, प्रदीप यादवलगायत नेताहरुले डा. भट्टराईको साथ छोडेपछि उनी पार्टीमा अल्पमत परेको एक नेताले बताएका छन् ।

डा. भट्टराई संसदीय दलमा मात्रै होइन, कार्यकारिणी समितिमा पनि अल्पमतमा परेका छन् । जसपामा १९ सांसद छन् भने ३३ जना कार्यकारिणी सदस्य छन् । बाबुराम भट्टराईको पक्षमा खुलेका मोहम्मद, प्रदीप अशोक लगायतका नेता र उनीहरुको पक्षमा रहेका अन्य नेताहरुले उनी बहुमतमा थिए ।

पार्टीभित्र अल्पमतमा परेका भट्टराईले बुधबार साँझ यादवलाई बोलाएर अलग हुने प्रस्ताव राखेका थिए । वैकल्पिक शक्ति बनाउने उद्देश्यका साथ पार्टी एकता गरेको भए पनि त्यसलाई संगठनात्मक स्वरुप दिन नसकेकाले अब सहमतिमा छुट्नु पर्ने प्रस्ताव भट्टराईले राखेका थिए ।

त्यसमा अध्यक्ष यादव पनि सहमत भएको भट्टराई निकट एक केन्द्रीय सदस्यले जानकारी दिएका छन् । उपेन्द्र यादव पक्षका नेताहरुले पनि दुई नेताबीच सहमतिमै अलग हुने सहमति भएको पुष्टि गरेका छन् । सिंहदबारमा भएको छलफलमा यादवले आफूले जानुस् भनेर नभन्ने तर अलग्गिने इच्छा भए नरोक्ने जवाफ दिएको उनी निकट स्रोतले बताएको छ ।

नेताहरुका अनुसार सहमतिमा अलग हुँदा केन्द्रीय सदस्य र सांसदहरुलाई कता जाने हो रोज्न दिने भनिएको छ । तर अहिलेसम्मको अवस्थामा यादव पक्षको बहुमत भएकाले जसपाको आधिकारिकता उनीसँग रहने देखिएको छ ।