काठमाडौं।प्रधानमन्त्री शेर बहादुर देउवाले अफगानिस्तानमा रहेका नेपालीहरुको उद्धारको लागि आवश्यक प्रवन्ध मिलाउन आइतबार नै निर्देशन दिइसकेको बताएका छन्।

अफगानिस्तानमा तालिबान लडाकुले देश कब्जा गरेपछि त्यहाँ राष्ट्रपति र उपराष्ट्रपति भागेर अर्काे देशको शरणमा गएका छन्।

अफगानिस्तानको वर्तमान अवस्था निकै असुरक्षित रहेको भन्दै विभिन्न मुलुकहरुले चार्टर विमान मार्फत आफ्ना नागरिकहरु फिर्ता लिइरहेका छन्।सोहि सन्दर्भमा त्यहाँ रहेका करिब १४ हजार नेपालीहरुको तत्काल उद्धार गर्न सामाजिक सञ्जाल मार्फत् सरकारको ध्यानकार्षण सहित चर्काे दबाब आएपछि प्रधानमन्त्री देउवाले उक्त कुरा बताएका हुन्।

सोमबार सामाजिक सञ्जाल मार्फत प्रधानमन्त्री देउवाले भनेका छन,अफगानिस्तानमा नेपालीको उपस्थिति र स्थितिको तथ्य लिन र अत्यावश्यक स्थितिमा उद्वार प्रबन्ध मिलाउन आइतबार निर्देशन गरिसकेको छु।

सुरक्षा र उद्वार प्रतीक्षा गरिरहेका नेपालीका लागि आवश्यक समन्वय र अभिभावकत्व सरकारको दायित्व हो।सजगता र गम्भीरतापुर्वक सरकारले यो जिम्मेवारी निभाउनेछ उनले भनेका छन्।