नेपाल सहित २२ जनालाई स्पष्टिकरण सोध्ने एमालेको निर्णय

काठमाडौं।नेकपा एमाले केन्द्रीय कमिटीको बैठकले वरिष्ठ नेता माधव कुमार नेपाल सहित २२ जना सांसदलाई स्पष्टिकरण सोध्ने निर्णय गरेको छ।पार्टीको निर्णय र हित विपरित फलोरक्रस गरेर प्रधानमन्त्रीमा कांग्रेसलाई विश्वासको मत दिएको भन्दै एमालेले स्पष्टिकरण सोध्ने निर्णय गरेको हो।

ललितपुरको च्यासलस्थित तुलसीलाल आमात्य स्मृति प्रतिष्ठानमा बसेको बैठकले प्रधानमन्त्री शेरबहादुर देउवालाई विश्वासको मत दिएको विषयमा २२ सांसदलाई स्पष्टीकरण सोध्ने निर्णय गरेको हो।उनीहरूलाई २४ घण्टे स्पष्टीकरण सोध्ने निर्णय भएको एमाले प्रवक्ता प्रदीप ज्ञवालीले बताए।

केन्द्रीय कमिटी बैठकमा अध्यक्ष केपी शर्मा ओलीले २२ सांसदलाई कारबाही गर्ने प्रस्ताव राखेको थिए।त्यसमाथि छलफल गर्दै केन्द्रीय कमिटीले २४ घण्टे स्पष्टीकरण सोध्ने निर्णय गरेको हो।

आइतबार प्रतिनिधि सभामा नेपालसहित एमालेका २२ सांसदले प्रधानमन्त्री शेरबहादुर देउवाको विश्वासको मत दिएका थिए। एमाले स्थायी कमिटीले विश्वासको मतको प्रस्तावको विपक्षमा मत दिने निर्णय गरेको थियो।