दसगजामा जन्मिएँ
वारि-पारी दुबैतिर
पिल्लरसँग ताँते खेल्दै
बिनासाथ कसैको
हुर्किएको यो कालो
म सदा मुसहर ।
सुख्खा खडेरीको
या बर्षातको हिलो
उस्तै छ माया माटोको
त्यसैले त यो कालो
म सदा मुसहर ।
समाचारमा नआउँने
नागरिकतामा नअटाउँने
उत्तर हो या दच्छिण
आफ्नै पसिनामा
बाँच्ने र बचाउँने
तिम्रो पिल्लर
मेरो बाल सखासँगै
जीवन बिताउँने यो कालो
म सदा मुसहर ।
माटोमा गलत रंग भर्ने
तेरो र मेरोमा
बुद्धलाई चोर्ने
चन्दनको लेपमा
मूर्तिलाई फोर्ने
सबैबाट मुक्त कालो
म सदा मुसहर ।
माटोले माटोलाई मिचेर
लोभमा आमालाई थिचेर
टोपीको रंगसँगै
ईमानको नाम फेर्ने
सबैबाट मुक्त कालो
म सदा मुसहर ।
प्रतिक्रिया