बन्दले कुनै अप्रिय घटना नभए पनि सडकमा सार्वजनिक सवारीसाधन नचल्दा कामकाजी सर्वसाधारण मर्कामा परेका छन् ।

अघिल्लो दिनको तुलनामा आज उपत्यकाका भित्री सडक चोकका पसल खुलेका छन् ।

पातलो सङ्ख्यामा केही भाडाका सवारीसाधन (टेम्पो, माइक्रोबस) बिहानैदेखि चलिरहेका छन् ।

आइतबार बन्दकर्ताले बिहानैदेखि तोडफोडको प्रयास गरेपछि प्रहरीले उनीहरुलाई पक्राउ गरेको थियो । आज भने बन्दकर्ताको चहलपहल सडकमा देखिदैन ।

चाबहिलदेखि सिंहदरबारसम्मको सडक अवलोकन गर्दा बन्दकर्ताको उपस्थिति देखिएन । मुख्य सडक र चोकमा प्रहरीे सुरक्षार्थ खटिएका छन् ।

चाबहिलबाट मोटरसाइकलमा अनामनगर आउनुभएका रमेश धमला र कोटेश्वरबाट सिंहदरबार आउनुभएका मानबहादुर थापाले पनि सडक सामान्य अवस्थामा कुनै अवरोध नभएको तर सवारीसाधनको सङ्ख्या भने पातलो रहेको बताउनुभयो ।

उपत्यकाका तीनवटै जिल्लामा अहिलेसम्म कुनै अप्रिय घटना नघटेको र जनजीवन सामान्य रहेको महानगरीय प्रहरी कार्यालयका वरिष्ठ प्रहरी उपरीक्षक नारायणसिंह खड्काले राससलाई जानकारी दिनुभयो ।

उहाँले अहिले सडकमा बन्दकर्ता फाट्टफुट्ट निस्किए पनि कुनै अराजक किसिमका गतिविधि नभएको उल्लेख गर्नुभयो ।

संविधानको मस्यौदाप्रति विरोध जनाउँदै नेकपा–माओवादीसहित केहि मधेसवादी दल र जनजाति केन्द्रित पार्टीले संयुक्तरुपमा बन्दको आव्हान गरेको हो ।