बजेट अभावमा बधशाला निमार्णको काम अन्योलमा परेपछि पशुसेवा विभागको रु ६० लाख र विराटनगर उपमहानगरपालिकाको रु ३८ लाख गरी रु ९८ लाख खेर जाने अवस्थामा पुगेको छ ।

आव २०६५÷६६ बजेट निकास भएपनि विराटनगर उपमहानगरपालिका–११ मा निर्माण सुरु गरिएको बधशालाले बजेट अभावमा हालसम्म पूर्णता नपाएको विराटनगर उपमहानगरपालिकाका कार्यकारी अधिकृत गोपालप्रसाद रेग्मीले बताउनुभयो ।

सरकारले बधशाला निर्माणका लागि छुट्टै बजेट नपठाएकाले निर्माण कार्य अन्योलमा परेको हो ।

विराटनगर उपमहानगरपालिका इन्जिनियर भरत न्यौपानेका अनुसार निर्माण सुरु हुन नपाउँदै सबै काम रोकिएको थियो ।

अहिलेसम्म रु एक करोड खर्च भइसकेको र अब भौतिक संरचना निर्माणमा मात्र रु दुई करोड ५० लाख र मेसिन खरिद र जडानको लागि गरी झन्डै रु नौ करोड खर्च हुने न्यौपानेको अनुमान छ ।