लगानी अनुकूल प्रतिफल प्राप्त नहुनु, जुटको माग घट्दै गएको तथा मजदुरको अभावका कारण किसानको आकर्षण घट्दै गएको हो । जुटको बाली भित्र्याउने मुख्य समय साउन मसान्तदेखि भदौको पहिलो सातासम्म हो । यस अवधिमा किसान जुटबाली भित्र्याएपछि अगहनी जातको धानको रोपाइँ गर्न पाउँछन् ।

चार दशक पहिले मोरङमा ६० हजारभन्दा बढी हेक्टरमा जुटको खेती हुने गरेकामा क्रमिक रुपमा घट्दै अहिले सात हजार ४४५ हेक्टर जग्गामा मात्र जुटको खेती हुने छ । जिल्ला कृषि विकास कार्यालयका अनुसार गत वर्ष एक हजार ३९० किलो प्रतिहेक्टरका दरले १० हजार ४१० मेट्रिकटन जुट उत्पादन भएको थियो ।

रङ्गेली मार्गको वरपरको क्षेत्रका साथै दक्षिणी भेगका बुधनगर, नोचा, भातिगछ, डाइनिया, अमदुवालगायतका गाविसमा जुटको खेती हुने गर्छ । विगतका वर्षमा मोरङमा उत्पादन भएका जुट भारतका साथै बङ्गलादेशमा निर्यात गरिन्थ्यो । विराटनगरस्थित जुट मिलहरुले पनि अधिकांश मात्रामा खरिद गर्ने गरेका थिए । अहिले अधिकांश जुट मिल बन्द भएपछि अधिकांश किसान अन्य बालीतर्फ अग्रसर भएका छन् ।