सोमबार, जेठ ३१ २०७८
काठमाडौं ००:१६
वासिङटन डिसी 14:31

बन्दकर्ताद्वारा ट्रक तोडफोड, ढुङ्गा लागेर एक घाइते

इनेप्लिज २०७२ साउन ८ गते ८:०२ मा प्रकाशित

रत्ननगर (चितवन), ८ साउन । नेत्र विक्रम चन्द विप्लव नेतृत्वको नेकपा माओवादीले आज गरेको बन्दको क्रममा चितवनमा दुई वटा ट्रकमा तोडफोड भएको छ ।

भरतपुरस्थित बसेनीमा आँपटारीतर्फ जाँदै गर्दा ट्रकमा तोडफोड भएको चितवनका प्रहरी प्रवक्ता राजन अधिकारीले जानकारी दिनुभयो । बा३ख ७५११ र बा१ख ६०८५ नम्बरको ट्रक तोडफोड भएका हुन् ।

सो क्रममा बन्दकर्ताको ढुङ्गा लागेर एकजना घाइते भएका छन् । घाइते हुने ट्रक चालक धादिङका ४८ वर्षीय भीम अर्याल रहेको प्रहरीले जनाएको छ । उनको मुखमा चोट लागेकाले अहिले भरतपुर मेडिकल कलेजमा उपचार भइरहेको छ ।

बन्दका कारण आज बिहानैदेखि चितवनमा सवारी सञ्चालन ठप्प छ भने बजारमा समेत असर परेको देखिएको छ । चितवनको भरतपुर, नारायणगढ, रत्ननगर, पर्सालगायत क्षेत्रमा बन्दको प्रभाव बिहानैदेखि परेको छ ।

विप्लव माओवादीका चितवन इन्चार्ज चिरन पुनले लिपुलेक सम्झौताको विरोधमा बन्द गरिएको जानकारी दिनुभयो । पुनले नेपाली भूमि लिपुलेक भएको दाबी गर्दै यसमा चीन र भारतले व्यापारिक नाका बनाउने सम्झौता गर्दासमेत नेपाल सरकार चुप लागेर बस्नु विडम्बना भएको बताउनुभयो ।

उहाँका अनुसार १६ बुँदे समझदारी र राहत वितरणमा भएको अनियमितताको विरोधमा बन्द आह्वान गरिएको हो । जिल्ला प्रहरी कार्यालय चितवनका अनुसार चितवनमा बिहानैदेखि सवारी सञ्चालन भएका छैनन् ।

प्रतिक्रिया