नेपाल टेलिकमले फेदी–९ मा ९०० मेगाहर्जको एसडिआर जिएसएम मोबाइल बिटिएस जडान गरेपछि जिल्लाको उत्तरी क्षेत्रमा पर्ने दर्जनभन्दा बढी गाविसमा नमस्ते मोवाइल सेवा सञ्चालन भएको हो ।

टेलिकमको रु चार करोडभन्दा बढी लागतमा सोलार प्यानेलसहितको टावर जडान गरिएको नेपाल टेलिकम खोटाङका प्रमुख भरोषी साहले बताउनुभयो । उहाँले भन्नुभयो, “उत्तरी क्षेत्रमा पर्ने दश गाविसलाई लक्षित गरेर टावर जडान गरेका हौँ तर यसले खोटाङको डेढ दर्जनभन्दा बढी र भोजपुरको पनि केही गाविसमा राम्रो काम गरेको छ ।”

जिल्लाको दुर्गम क्षेत्र मानिने फेदी गाविसमा टावर जडान गरिएपछि उत्तरी क्षेत्रका हजारौँ सेवाग्राहीले एकसाथ कुरा गर्न पाएका छन् । सबै प्रकारका टेलिफोन सेवाको पहुँच नभएको त्यस क्षेत्रमा नमस्ते मोबाइल सेवा सञ्चालन भएपछि सेवाग्राहीको सङ्ख्यासमेत वृद्धि भएको टेलिकमले जनाएको छ ।

टावर जडान भएपछि डेढ/दुई घन्टा धाएर फोन गर्न जानुपर्ने समस्या हटेको खार्मी–५ का हर्कराज राईले बताउनुभयो । एमाले गाउँ पार्टी अध्यक्षसमेत रहनुभएका राईले भन्नुभयो, “हरेक बैठक तथा पार्टीको काम घरैमा बसीबसी गर्न पाइएको छ, यसले गर्दा फोन गर्न जानआउन लाग्ने समयको समेत बचत भएको छ ।”

फेदी, पाथेका, खार्मी, बास्पानी, खार्ताम्छा, बाक्सिला, सप्तेश्वर, जालपा, हौंचुर र कुभिण्डे गाविसका उपभोक्तालाई लक्षित गरेर जडान गरिएको टावरले आसपासका अन्य गाविसका साथै भोजपुरका केही गाविसमा समेत सहज रुपमा सेवा दिएको टेलिकमले जनाएको छ । टावर सञ्चालनका लागि स्थानीय जलविद्युत् आयोजनाबाट विद्युत् उपलब्ध गराएको छ भने विकल्पमा सोलार प्यानेलसमेत जडान गरिएको छ ।