सीमा प्रहरी चौकी नजिकै रहेको रानी पशु चेकपोस्टमा पशु चिकित्सक नहुँदा कार्यालय सहायकको भरमा सञ्चालन भइरहेको छ । भारतका विभिन्न जिल्लाबाट जोगवनी भन्सार नाका हँुदै विराटनगर ल्याइने पशुको स्वास्थ्य जाँचका लागि सो चेकपोस्ट राखिएको हो । तर कार्यालयमा चिकित्सक नबस्दा कार्यालय सहायक होमनाथ खतिवडाले सबै काम गर्दै आउनुभएको छ ।

सो कार्यालयमा औषधि र सुइँ राख्ने फ्रिजसमेत बिग्रिएको छ । सो चेकपोस्टबाट चेक पास भएपछि मात्र विराटनगर भन्सार कार्यालयले पशुको भन्सार लिने गरेको छ तर कार्यालय सहायकले पशुको अवस्था हेरेर पशुको स्वास्थ्य ठीक भएको कागज बनाएर कार्यालयका प्रमुख कहाँ हस्ताक्षर गर्न पठाउने गरेको कार्यालय सहायक खतिवडाले बताउनुभयो ।

सो आधारमा व्यापारीले भन्सार बुझाउने गरेका छन् । भारतको बथनाहाबाट मासुखान आयात गरिने खसी जाँचमा कार्यालय सहायकको भरपर्दा उपभोक्ताले शुद्ध मासु खान नपाएको उपभोक्ता मञ्चका अध्यक्ष मोहन भट्टराईले गुनासो गर्नुभयो ।

विराटनगर पशु क्वारेनटाइनका कार्यालय प्रमुख डा फेकनलाल सहासँग सो विषयमा बुझ्न खोज्दा उहाँले केही भन्न चाहनु भएन ।