बिहीबार, असार १० २०७८
काठमाडौं १२:२०
वासिङटन डिसी 02:35

पुस्तकालय खोल्न सरकारी अनुदान

इनेप्लिज २०७२ साउन २ गते २:३० मा प्रकाशित

Baglung_district_locationबागलुङ, २ साउन । गुणस्तरीय शिक्षामा सहयोग पुर्‍याउन जिल्लाका १५ विद्यालयले यो वर्ष पुस्तकालय स्थापना गरेका छन् ।

जिल्ला शिक्षा कार्यालयको अनुदान सहयोगमा ती विद्यालयले पुस्तकालय खोलेका हुन् । पुस्तकालय स्थापनाका लागि प्रतिविद्यालय रु एक लाखका दरले अनुदान दिइएको जिल्ला शिक्षा कार्यालयले जनाएको छ ।

सात वटा उच्च मावि र आठ वटा माविले अनुदान पाएको जिल्ला शिक्षा अधिकारी विष्णुप्रसाद तिवारीले बताउनुभयो । कार्यालयले बर्सेनि पुस्तकालय स्थापनाका लागि विद्यालयलाई अनुदान दिँदै आएको छ ।

यो वर्ष अनुदान पाएर पुस्तकालय स्थापना गर्नेमा सरस्वती उच्च मावि दुदिलाभाटी, सुन्तलाचौर उच्च मावि दमेक, लेखानी उच्च मावि लेखानी, हरि उच्च मावि हिल, लक्ष्मी उच्च मावि धम्जा, जनकल्याण उच्च मावि छिस्ती र त्रिभुवन उच्च मावि पैयूँपाटा रहेका छन् ।

त्यस्तै मावितर्फ तित्याङ मावि तित्याङ, धुल्लुलिउवा मावि धुल्लुबास्कोट, ज्ञानोदय मावि बोवाङ, प्रकाश मावि खुङ्गा, भुजी मावि अधिकारीचौर, अर्गल मावि अर्गल, सल्यान सुखौरा मावि सल्यान र किटेनी मावि रणसिंहकिटेनी रहेका छन् । “पुस्तकालय निर्माण, पुस्तक, सामग्री खरिद र व्यवस्थापनका लागि अनुदान दिइने गरिएको छ” जिशिअ तिवारीले भन्नुभयो ।
पुस्तकालयप्रति विद्यार्थीको आकर्षण बढाउन पुस्तकालय स्थापनामा जोड दिइएको उहाँको भनाइ छ । अतिरिक्त समयमा पुस्तकालय जाने र त्यसको प्रयोगमा विद्यार्थीलाई प्रोत्साहित गर्न पुस्तकालय अनुदान कार्यक्रम सञ्चालन भएको शाखा अधिकृत खेम आचार्यले बताउनुभयो ।

नियमित पुस्तकालय जाने बानीले विद्यार्थीको ज्ञान अभिवृद्धि हुनुका साथै सिकाइ उपलब्धिमा पनि सकारात्मक टेवा पुग्ने अधिकृत आचार्यको भनाइ छ । उहाँले जिल्लाभरका विद्यालयमा पुस्तकालय स्थापनाको लक्ष्य रहेको बताउनुभयो ।

जिल्लाका कतिपय विद्यालयले विभिन्न दाताको सहयोगमा विद्युतीय पुस्तकालयसमेत सञ्चालनमा ल्याइएका छन् । केही विद्यालयमा दक्ष जनशक्ति र व्यवस्थापन अभावमा विद्युतीय पुस्तकालय चलेका छैनन् ।

प्रतिक्रिया