भूकम्प पिडित सिद्धिबासीलाई सहयोग

रत्ननगर–१७, जेठ

गत बैसाख १२ गते र त्यसपछिका पराकम्पनहरुबाट पिडित चितवनको पहाडी गा.वि.स. सिद्धिका १ सय २४ परिवारलाई खाद्यान्न सहयोग गरिएको छ । जेन्टल हर्ट फाउण्डेसन काठमाण्डौको सहयोगमा सिद्धि वडा नं. १ खोलागाउँ, वडा नं. ६ मझवाङ्ग र लालीवाङ्गका भूकम्प पिडित परिवारलाई चामल १५ किलो, दाल, तेल, नुन, साबुन सहयोग गरिएको थियो । फाउण्डेसनका अध्यक्ष अर्जुन ढकाल, सदस्य शोभा ढकाल तामाङ्ग, कोअर्डिनेटर ईश्वर श्रेष्ठले आज आइतबार सिद्धिमा पुगी भूकम्प पिडितलाई सो सहयोग सामाग्री हस्तान्तरण गर्नुभएको थियो । त्यसैगरी सोही संस्थाले नवलपरासीको पिठौली ६ को मुसहर बस्तीका ६५ घरपरिवारलाई खाद्यान्न र लामखुट्टेको झुल सहयोग गरेको फाउण्डेसनका अध्यक्ष ढकालले जानकारी दिनुभयो ।

रक्तदान

भूकम्प पिडित बिरामीहरुलाई सहयोग गर्ने उद्देश्यले नेपाल रेडक्रस सोसाइटी उपशाखा जुटपानी खोलेसिमलको आयोजनामा रक्तदान गरिएको छ । रक्तदान कार्यक्रममा ७ महिला सहित ५० जनाले रक्तदान गर्नुभएको संस्थाका सभापति गणेश शर्मा पौडेलले जानकारी दिनुभयो ।