जिल्लाको दक्षिणी क्षेत्रमा रहेको बाङ्गेशाल–६ स्थित सुकुम्बासी बस्तीमा खानेपानी आयोजना सञ्चालनमा आएपछि यहाँका सुकुम्बासीले वर्षौंदेखि भोग्दै आएको खानेपानी समस्या अन्त्य भएको हो ।

खानेपानी तथा सरसफाइ डिभिजन कार्यालय, दातृ निकाय र स्थानीयको श्रमदान गरी रु ३८ लाख २५ हजार लागतमा खानेपानी आयोजना सम्पन्न भएको स्थानीय निर्माण तथा उपभोक्ता समितिका अध्यक्ष मोहम्मद मियाँले बताउनुभयो ।

“वर्षौंदेखि पानीको समस्या रहेको थियो ।” अध्यक्ष मियाँले भन्नुभयो–“आयोजना निर्माणमा स्थानीय उपभोक्ताको रु १७ लाख ५० हजार बराबरको श्रमदान रहेकोे छ ।”

आयोजना सम्पन्न भएपछि बाङ्गेशाल– ६ फोर्सावाङका ७५ सुकुम्बासी घरधुरी र कालिवन गाउँका १०० घरधुरी प्रत्यक्ष लाभान्वित भएका छन् ।

बस्तीदेखि झन्डै २०० मिटर टाढा रहेको कालिखोला मुहानबाट मोटर जडान गरी यी बस्तीमा खानेपानी पु¥याइएको खानेपानी तथा सरसफाइ डिभिजन कार्यालय बिजुवारले जनाएको छ ।
“सुकुम्बासी बस्तीलाई केन्द्रित गर्दै निर्माण गरिएको आयोजनामा ५४ सुकुम्बासी घर र कालिवन गाउँका अन्य २७ घरमा धारा जडान गरिएको छ ।” निर्माण समितिका अध्यक्ष मियाँले भन्नुभयो– “ स्थानीयको सक्रियतामा अन्य १० स्थानमा सार्वजनिक धारासमेत जडान गरिएको छ ।” अठार हजार लिटर क्षमताको ओभरहेड ट्याङ्कीबाट यी बस्तीमा २४सैँ घन्टा खानेपानी उपलब्ध गराउने गरी आयोजना निर्माण भएको खानेपानी तथा सरसफाइ डिभिजन प्रमुख नन्दलाल बन्जाडेले बताउनुभयो ।

धारा जडानका लागि रु एक हजार २०० मूल्यको पाइप र अन्य जडान सामग्रीसमेत निःशुल्क स्थानीयले पाएका छन् । राप्ती नदीसँगै स्थानीय कुवा र खोलाको पानी खान बाध्य यहाँका सुकुम्बासी घरमै धारा जडान हुँदा खुसी भएका छन् ।
स्थानीय सुकुम्बासी कालिबहादुर मिँयाले भन्नुभयो–“आयोजनाले गर्दा एक गाग्री पानीका लागि घन्टौँ समय खर्च गर्ने समस्या समाधान भएको छ ।”

खानेपानी योजना सञ्चालनपश्चात जिल्लाले लिएको सरसफाइ कार्यक्रमलाई समेत सहयोग पुग्ने डिभिजन कार्यालयले जनाएको छ । यहाँ पानीको अभावमा निर्माण भएका शौचालय प्रयोगमा आउन नसक्दा समया उत्पन्न भएको थियो ।

“सन् २०१७ को अन्तिमसम्ममा सबै नागरिकको पहुँचमा आधारभूतस्तरको पानी लैजाने हाम्रो लक्ष्य रहेको छ ।” डिभिजन प्रमुख बन्जाडेले भन्नुभयो– “जिल्लामा सरसरफाइ अभियान र पानीको पहुँच वृद्धिका लागि जिल्लास्तरमा यस्ता आयोजना निर्माण गर्ने क्रम जारी छ ।” यहाँको पानी आयोजनामा खानेपानी डिभिजन कार्यालयको रु १७ लाख ५० हजार, हेफर इन्टरनेसनलको रु एक लाख ७५ हजार, फूलबारी ग्रामीण विकास संस्थाको रु एक लाख र गरिबी निवारण कोषको रु ५० हजार लगानी रहेका छन् ।

योजना सम्पन्नपश्चात शनिबारदेखि खानेपानी धारा सञ्चालनमा आएको स्थानीयवासीले बताएका छन् ।