इनेप्लिज
२०७१ चैत १८ गते ३:०१ मा प्रकाशित
रत्ननगर (चितवन), १८ चैत । चितवनको भरतपुर अस्पतालमा स्वाइनफ्लुका बिरामीको सहजताका लागि स्थापना गरिएको हेल्प डेस्क प्रभावहीन भएको छ ।
उक्त डेस्कमा खासै मानिस सोधीखोजीका लागि आउने गरेका छैनन् । डेस्कमा चैत १३ देखि १७ गतेसम्म २७ जनाले मात्रै जानकारी लिएका छन् । त्यसमा पनि अन्य अस्पतालबाट पठाइएका बिरामीले जानकारी लिएको पाइएको छ ।
डेस्कमा बस्ने कर्मचारी निलम गौतम खासै मान्छे नआउने गरेको बताउनुहुन्छ । आएकाहरू रोग के हो, कसरी उपचार हुन्छ, टिकट कहाँ काट्ने भनेर सोध्ने गरेका छन् ।
आउनेलाई जनस्वास्थ्यले दिएको पर्चा वितरण गर्ने गरेको गौतमले बताउनुभयो । हेल्प डेस्कमा अन्य कामले आएका र अन्य रोगका बिरामीले बढी सोधखोज गर्ने र बिरामीको उपचार प्रक्रियाबारे बुझ्ने गरेका छन् ।
स्वाइनफ्लुका बिरामी बढ्न थालेपछि डेस्क स्थापना गरिएको हो । जिल्लामा परीक्षणका लागि पठाइएका ३५६ बिरामीमध्ये १२१ जनामा स्वाइनफ्लु पुष्टि भएको छ ।
चितवनका मात्रै १०१ जना बिरामी छन् भने अरु बिरामी बाहिरी जिल्लाका छन् ।
प्रतिक्रिया