पृथ्वीराजमार्ग बस व्यवसायी समिति, पीडित पक्ष र प्रहरीको रोहबरमा गएराति भएको सहमतिअनुसार आज शव परीक्षण गरिने र त्यसपछि सेती नदीको किनारमा सामूहिक दाहसंस्कार गरिने भएको पीडित पक्षका तर्फबाट वार्तामा रहनुभएका प्रेमबहादुर जिसीले बताउनुभयो ।

सहमतिअनुसार मृतक परिवारलाई बस व्यवसायी समितिले जनही रु एक लाख २५ हजार क्षतिपूर्ति दिने र घाइतेहरुको स्वदेश तथा विदेशको सम्पूर्ण खर्च व्यहोर्ने भएको छ ।

कास्कीकोटबाट पोखरातर्फ आइरहेको ग१ख ४८४९ नंको बस सराङकोटको गोठादीमा दुर्घटना हुँदा छजनाको मृत्यु हुनुका साथै ५० जनाभन्दा बढी घाइते भएका थिए ।

दुर्घटनामा कास्कीकोटका २६ वर्षीय विवश तिमिल्सिना, ५० वर्षीय हरिबहादुर खत्री, ४० वर्षीया गोमा लुइँटेल, ५० वर्षीय लेखबहादुर ढकाल, ४५ वर्षीय तारा थापा र ५५ वर्षीया भिमा खत्रीको मृत्यु भएको थियो ।

सख्त घाइते आठजनाको काठमाडौँमा र अरुको पोखराका विभिन्न अस्पतालमा उपचार भइरहेको छ ।