काठमाडौँ, १५ चैत । विश्वदर्शन अभियान नेपालद्वारा शनिबार आयोजित सत्सङ्ग कार्यक्रममा प्राकृतिक चिकित्सा तथा योगको क्षेत्रमा योगदान पुर्याउनु भएका हरिप्रसाद पोख्रेल ‘मानसाग्नि’लाई सम्मान गरियो ।
सो अवसरमा अभियानका सल्लाहकार प्रा गोविन्दराज भट्टराईले पूर्वीय दर्शन र सभ्यता गौरवपूर्ण भएको र पश्चिमी ठूला विद्वानले पनि यो कुरा स्वीकार गरेको बताउँदै अभियानका यात्रीद्वय नवराज र नारायण भट्टराईले विश्वमा नेपाललाई चिनाउन गरेको प्रयासको प्रशंसा गर्नुभयो ।
सम्मानित व्यक्तित्व पोख्रेलले नेपाल गरिब देश नभई ‘गुरुदेश’ भएको बताउँदै नेपालका गौरवपूर्ण पक्ष विश्वमा चिनाउन यात्रीद्वयलाई शुभकामना दिनुभयो ।
श्रम तथा रोजगार मन्त्रालयका उपसचिव देवराज ढकालले यात्रीद्वय नेपाल दर्शनका क्रममा रुकुममा पुग्दा आफू त्यहीँ प्रजिअ रहँदा भेट भएको बताउँदै उहाँहरुको प्रयासको सराहना गर्नुभयो ।
समारोहमा कामधेनु गाईफार्म, च्याङ्ली, गोरखाका राजेन्द्रप्रसाद पन्तले आफू गाईपालनबाटै देश सेवामा लागेको बताउँदै देश चिनाउने कार्यमा यात्रीद्वयको समर्पणको प्रशंसा गर्नुभयो । कार्यक्रमको सुरुमा विश्व दर्शन योग केन्द्रकी योग शिक्षिका कविता ढुङ्गानाले योगाभ्यास गराउनुभएको थियो ।
प्रतिक्रिया