फिनल्याड सरकारको सहयोगमा सञ्चालित परियोजनामार्फत अर्मन, भकिम्ली र दरवाङ गाविसमा निर्माण भएका ती आयोजनाबाट २७६ घरपरिवारका एक हजार ५२७ जनसङ्ख्या लाभान्वित भएका छन् ।

परियोजना, जिविस, गाविस र उपभोक्ताको रु एक करोड ६२ लाख २३ हजार ६९० लगानीमा आयोजना निर्माण गरिएको परियोजनाका इञ्जिनियर गम्भीरमान गुरुङले जानकारी दिनुभयो ।

परियोजनाले ९७ लाख लाख ६९ हजार २७७ रुपैयाँ सहयोग गरेको योजनामा उपभोक्ताले ४६ लाख ६९ हजार ८०७ रुपैयाँ बराबरको श्रमदान गरेका छन् ।

सम्बन्धित गाविस, जिविस र उपभोक्ताले नगद सङ्कलन पनि गरेका छन् । अर्मन गाविसमा चार वटा खरसुधार, थातीकुना, ओखरेनी र मुलपानी खानेपानी योजना निर्माण भएको छ भने भकिम्ली गाविस–१ मुसुङमा चिसापानी र दरवाङ गाविस–४ छपालीमा लामेछहरा खानेपानी योजना निर्माण गरिएको छ ।

यसअघि असुरक्षित मुहानबाट ल्याइएको खानेपानीका लागि समेत टाढा–टाढा पुग्ने गरेका स्थानीयवासीलाई टोलटोलमा खानेपानी वितरण गरेपछि राहत मिलेको खरसुधारा खानेपानी योजना किमचौरका अध्यक्ष थमबहादुर बिकले बताउनुभयो ।

एघार गाविसमा लागू भएको परियोजनामार्फत थप तीन वटा खानेपानी योजना निर्माण सुरु भएको परियोजनाका सल्लाहकार भीम मोक्तानले जानकारी दिनुभयो ।

उहाँका अनुसार रुम गाविस–८ मा इग्रेखोला र रुम ३, ४, ५ मा डमासीलेक खानेपानी आयोजना निर्माणमा लागि उपभोक्ता समितिसँग सम्झौता भइसकेको छ भने ओखरबोट १ र २ मा थाप्लेडाँडा भुमेथान खानेपानी आयोजना सम्झौताको तयारीमा छ ।