पछिल्लो एक वर्षमा मात्रै सुदूरपश्चिमा ३५० एचआइभी सङ्क्रमितको सङ्ख्या थपिएको छ । क्षेत्रीय स्वास्थ्य निर्देशनालय दिपायलको पछिल्लो तथ्याङ्कअनुसार सुदूरपश्चिमभर एचआइभी सङ्क्रमितको सङ्ख्या छ हजार २०० नाघेको छ ।

एक वर्षअघि सङ्क्रमितको सङ्ख्या पाँच हजार ९०४ थियो । यस्तै करिब छ हजारकै हाराहारीमा अझै पनि सङ्क्रमित खुल्न नसकेको एचआइभी एड्स न्यूनीकरणको क्षेत्रमा कार्यरत सङ्घसंस्थाले जनाएका छन् ।

गरिबी, अशिक्षा, चेतनाको कमी तथा स्वास्थ्यमा सहज पहुँचको कमीलगायत विभिन्न कारणले ५० प्रतिशत सङ्क्रमित समाजमा लुकेरै बसिरहेको क्षेत्रीय स्वास्थ्य निर्देशनालयका दयाकृष्ण पन्तले बताउनुभयो ।

सुदूरपश्चिममा एचआइभी सङ्क्रमितको सङ्ख्या बर्सेनि बढ्नुको मुख्य कारण यस क्षेत्रका युवाहरू कामका लागि भारत गएपछि सङ्क्रमित भएर फर्कने र त्यसपछि श्रीमती र नवजात शिशुमा समेत एचआइभी देखिनु रहेको छ ।

सुदूरपश्चिममा सबैभन्दा बढी कैलाली, कञ्चनपुर, अछाम र डोटी जिल्ला एचआइभीको उच्च जोखिम रहेको छ । क्षेत्रीय स्वास्थ्य निर्देशनालयको तथ्याङ्कअनुसार कैलालीमा सबैभन्दा बढी दुई हजार ९४८, अछाममा एक हजार ३९१, डोटीमा ९९५, कञ्चनपुरमा ४२०, बैतडीमा १५६ र डडेल्धुरामा १४९ जना सङ्क्रमित रहेका छन् ।

पछिल्लो एक वर्षको अवधिमा कैलालीमा १५० जना सङ्क्रमित थपिएका छन् । यस्तै पछिल्लो वर्ष बझाङमा ८२, बाजुरामा ७४ र दाुर्चलामा २३ जनामा एचआइभी सङ्क्रमण देखिएको थियो ।

निर्देशनालयका अनुसार सङ्क्रमितमध्ये करिब तीन हजारले एआरटी सेवा लिइरहेका छन् । यहाँ एड्सबाट नागरिकलाई बच्न र बचाउन सरकारी तथा गैरसरकारी संस्थाहरूको भूमिका सक्रिय रहेपनि यसको सङ्क्रमणमा कमी आएको छैन ।