इनेप्लिज
२०७१ चैत ३ गते ३:५७ मा प्रकाशित
बागलुङ, ३ चैत । यही चैत ५ गतेदेखि सुरु हुने प्रवेशिका परीक्षा केन्द्रहरु ‘छात्रामैत्री’ बनाइने भएको छ । यसका लागि जिल्लाका सबै परीक्षा केन्द्रमा छात्रामैत्री शौचालय, ‘सेनेटरी प्याड’ र प्राथमिक उपचारको व्यवस्था गरिने भएको हो ।
महिनावारी भएका र हुनसक्ने छात्राको सहजताका लागि परीक्षा केन्द्रका छात्रा शौचालयमा ‘सेनेटरी प्याड’को व्यवस्था गर्न लागिएको जिल्ला शिक्षा कार्यालयले जनाएको छ । सबै परीक्षा केन्द्रका केन्द्राध्यक्षलाई बालमैत्री व्यवहार गर्न, प्राथमिक उपचार र छात्राका लागि ‘सेनेटरी प्याड’ को व्यवस्थापन गर्न निर्देशन दिइएको जिल्ला शिक्षा अधिकारी विष्णुप्रसाद तिवारीले बताउनुभयो ।
यसअघि यस्ता व्यवस्थाहरु नहुँदा छात्रा परीक्षार्थीले समस्या झेल्दै आएका थिए । परीक्षा केन्द्रमा ‘सेनेटरी प्याड’ व्यवस्था गर्नुपर्ने माग विभिन्न सामाजिक सङ्घसंस्था र अधिकारकर्मीले राख्दै आएका थिए । यसैगरी, प्रवेशिका परीक्षाको सबै तयारी पूरा भएको शिक्षा कार्यालयले जनाएको छ । यो वर्षको प्रवेशिका परीक्षामा बागलुङबाट नियमिततर्फ पाँच हजार १२१ र एक्जाम्टेडतर्फ दुई हजार २१२ गरी सात हजार ३३३ परीक्षार्थी सहभागी हुने भएका छन् । जिल्लाभर गरी ३० वटा परीक्षा केन्द्र निर्धारण गरिएको छ ।
त्यस्तै, जनताधन उच्च माध्यमिक विद्यालयका एक दृष्टिविहीन विद्यार्थीले प्रवेशिका परीक्षा दिने जनाइएको छ । परीक्षा सञ्चालनका लागि ३० केन्द्राध्यक्ष, ३२ सहायक केन्द्राध्यक्ष, २९५ निरीक्षक, ९६ सहयागी कर्मचारी र करिब ३०० सुरक्षाकर्मी परिचालन गरिने भएको छ ।
प्रतिक्रिया