शनिबार, मंसिर २० २०७७
काठमाडौं १२:१६
वासिङटन डिसी 01:31

लम्जुङमा गाडी दुर्घटना: एकको मृत्यु, छ गम्भीर घाइते

इनेप्लिज २०७१ चैत १ गते ९:३३ मा प्रकाशित

Crash-for-Cash-Cover-Icon-300x269काठमाडौँ, १ चैत । लम्जुङको बाहुनडाँडा गाविस–८ मा आइतबार बिहान एक निजी गाडी दुर्घटना हुँदा एक जनाको मृत्यु भएको छ । यो दुर्घटनामा अन्य छ जना गम्भीर घाइते भएका छन् ।

लम्जुङको टाक्रिङबाट बाहुनडाँडातर्फ जाँदै गरेको जुनोसिस कन्सल्टेन्सीको बा २ च ७४३३ नम्बरको गाडी दुर्घटनामा परेको जिल्ला प्रहरी कार्यालय लम्जुङले जनाएको छ । मृत्यु हुनेमा काठमाडौँका अन्दाजी ३५ वर्षीय रवीन्द्र श्रेष्ठ रहेको जिप्रकाका प्रहरी नायव उपरीक्षक पवनकुमार गिरीले बताउनुभयो ।

घाइते हुनेहरुमा काठमाडौँका विनोद खड्का, वीरेन्द्र वानिया, नितेश श्रेष्ठ र ध्रुव मानन्धर तथा सिन्धुपाल्चोकका प्रकाश माझी र चितवन कुरिनटारका हीराबहादुर मगर रहेको प्रहरीले जनाएको छ । घाइते छ जनालाई उपचारका लागि हेलिकप्टरमा काठमाडौँ ल्याइएको छ । सोही विमानमा राखी मृतकको शव आइतबार नै काठमाडौँ ल्याइएको बताइएको छ ।

प्रहरी नायव उपरीक्षक गिरीका अनुसार गाडी सडकबाट एक सय मिटर तल खसेको थियो । अघिल्लो दिन पानी परेका कारण उक्त सडकखण्ड चिप्लो भई गाडी दुर्घटनामा परेको हुनसक्ने प्रहरीको अनुमान छ ।

प्रतिक्रिया