जिल्लामा गत वर्षको तुलनामा १४ दशमलव ९६ प्रतिशतले उत्पादन घटेको जिल्ला कृषि विकास कार्यालयले जनाएको छ । जिल्लाको ३१० हेक्टर क्षेत्रफलबाट तीन हजार ५०३ मेट्रिक टन सुन्तला उत्पादन भएको छ । गत आव २०७०÷७१ मा इलाममा ३०० हेक्टर क्षेत्रफलमा चार हजार मेट्रिक टन सुन्तला उत्पादन भएको थियो ।

रोगले पुराना बोट सुक्दै गएपछि सुन्तला उत्पादनमा ह्रास आएको कार्यालयका प्राविधिक सहायक उद्धव पौडेलले बताउनुभयो । जरा सुक्ने (रुडरङ), क्याकुर, डिक्याव जस्ता रोगले सुन्तलाको बोट मर्न थालेको छ । सुन्तलाको पकेट क्षेत्र मानिएको सुम्वेक, सोयाक, नामसालिङ, बरबोटेलगायत गाविसमा बोटको टुप्पो सुक्ने रोग देखापरेकाले उत्पादन घटेको हुन सक्ने प्राविधिक पौडेलको अनुमान छ ।

बोट मर्न थालेपछि किसान निराश भएका छन् । जिल्ला कृषि विकास कार्यालय इलामले बर्सेनि सुन्तलाको बिरुवा उपलब्ध गराए पनि उत्पादनमा ह्रास आएको छ । गत वर्ष कार्यालयले एक हजार हेक्टर क्षेत्रफलका लागि तीन हजार सुन्तलाका बिरुवा वितरण गरेको जनाएको छ ।

यस वर्ष एक हजार ५०० बिरुवा वितरण गरिएको छ । जिल्लामा उत्पादन भएको ७५ प्रतिशत सुन्तला झापातर्फ र बाँकी जिल्लामा नै खपत हुने कार्यालयले जनाएको छ ।