आन्दोलनरत दलसँग वार्ता र संविधान निर्माणको प्रक्रिया सँगसँगै अघि बढ्ने उहाँले बताउनुभयो । नेपाली काँग्रेस जिल्ला कार्य समिति इलामले आज इलाममा आयोजना गरेको कार्यकर्ता भेटघाटको अवसरमा बोल्दै देउवाले वार्ता र प्रक्रियासँगै अघि बढ्ने बताउनुभएको हो । वार्ता सँगसँगै प्रक्रिया पनि अघि बढ्छ, उहाँले भन्नुभयो, “नेपाली काँग्रेस सहमतिमै संविधान बनोस् भन्ने चाहन्छ ।”

प्रश्नावली समिति खारेज नहुने पनि उहाँको भनाइ छ । एमाओवादीले भनेजस्तो प्रश्नावली समिति खारेज हुँदैन, सहमतिका लागि केही दिन संविधानसभा स्थगन मात्र भएको हो उहाँले भन्नुभयो । एनेकपा माओवादी नेतृत्वको ३० दलीय मोर्चाले घुर्की लगाइरहेको आरोप पनि उहाँले लगाउनुभयो ।

देउवाले प्रधानमन्त्री सुशील कोइरालाले ३० दलीय मोर्चालाई वार्तामा बोलाइसकेको भन्दै मोर्चालाई वार्तामा आउनसमेत आग्रह गर्नुभयो । वार्तामा नआए अब धेरै दिन पर्खेर बस्न नसकिने उहाँले बताउनुभयो ।

आफ्नै पार्टीको नेतृत्वमा नयाँ संविधान जारी हुने उहाँले कार्यकर्तालाई बताउनुभयो । अहिलेकै सरकारले संविधान बनाउँछ, उहाँले भन्नुभयो ।

देउवाले संविधान निर्माणका लागि आफ्नो पार्टी हदैसम्म लचिलो हुन तयार रहेको बताउँदै मोर्चालाई वार्तामा बोलाउँदा समेत वार्तामा नआउनु दुःखको कुरा हो, भन्नुभयो ।