निकुञ्जले आज पत्रकार सम्मेलन गरी चितवन कोराकका ३१ वर्षीय राजकुमार प्रजालाई सार्वजनिक गरेको हो ।

पत्रकारसँग प्रजाले आफैँले २० वटा गैँडा मारेर खाग बेचेको, दुईवटा अरुले नै मारेको गैँडाको खाग बेचेको र पाँचवटा गैँडालाई मार्ने प्रयास गरी घाइते बनाएको स्वीकार गरेका छन् ।

निकुञ्जका अनुसार विभिन्न १५ वटा मुद्दा लागेपनि उनी २०६० सालदेखि फरार भएका थिए । आरोपी प्रजा मुलुक बाहिर गएको थाहा पाएपछि ‘रेडकर्नर नोटिस’ जारी गरी पक्राउका लागि अन्तर्राष्ट्रियस्तरमा पहल गरिएको थियो ।

उनीविरुद्धका छवटा मुद्दाको फैसलासमेत भएको र हरेक मुद्दामा १५ वर्ष कैद र रु एक लाख जरिवानासमेत तोकिएको छ । खोजतलासका क्रममा अघिल्लो महिना मलेसियामा काम गर्दै गर्दा उनलाई पक्राउ गरी माघ गत २६ गते निकुञ्ज ल्याइएको निकुञ्जका सहायक संरक्षण अधिकृत विष्णु थपलियाले बताउनुभयो ।

प्रजा नक्कली नागरिकता बनाई राहदानी निकालेर मलेसियामा बस्दै आएको केन्द्रीय अनुसन्धान व्युरोले जनाएको छ । उनले गोरखाबाट भक्तराज गिरीको नाममा नक्कली नागरिकता लिई राहदानी बनाएको पाइएको व्युरोका प्रहरी नायब उपरीक्षक सविन प्रधानले जानकारी दिनुभयो ।

पत्रकार सम्मेलनका क्रममा निकुञ्ज विभागका महानिर्देशक टीकाराम अधिकारीले प्रजा पक्राउ परेसँगै निकुञ्जलाई महत्वपूर्ण सफलता मिलेको बताउनुभयो ।