कलैया, २ फागुन । विभिन्न सरकारी कार्यालय बाराको कलैयाबाट सिमरा सार्ने निर्णयको विरोधमा उत्रिएका आन्दोलनकारी र प्रहरीबीच आज झडप भएको छ ।

नेपाली काँग्रेसको पार्टी कार्यालय तोडफोड गर्न गएका आन्दोलनकारी र प्रहरीबीच भएको झडपमा प्रहरीले दर्जनौँ राउण्ड रवरको गोली प्रहार गर्दा दुवै पक्षका दर्जनौँ व्यक्ति घाइते भएका छन् ।

जिल्ला मालपोत, नापी, भूमिसुधार कार्यालय कलैयाबाट सिमरा सार्ने सरकारको निर्णयको विरोधमा केही दिनदेखि बारा उद्योग वाणिज्य सङ्घको अगुवाईमा लेखापढी व्यवसायी सङ्घ, किराना पसल व्यवसायी सङ्घ, तरकारी व्यवसायी सङ्घ र केही राजनीतिक दलहरुले संयुक्त रुपमा आन्दोलन गरिरहेका छन् ।

आन्दोलनका कारण कलैया बजार आज पनि बन्द र तनावको अवस्थामा रहेको छ ।