ग्यासको अभाव भएपछि उपभोक्ता काम छाडी दिनभर लाइनमा उभिन बाध्य भएका छन् । गत असोजदेखि रौतहटमा ग्यास अभाव भएको छ । ग्यास नपाएपछि सर्वसाधारण मट्टितेल प्रयोग गर्न बाध्य भएका छन् । ग्यास विक्रेताले आफ्नो इष्टमित्र, आफन्तलाई ग्रहायता दिने भएकाले सर्वसाधारण मर्कामा परेका हुन् । ग्यास अभावले दाउरा र कोइलाको प्रयोग बढेर गएको छ ।

ग्यास अभावका कारण होटल व्यवसायी सबैभन्दा बढी मर्कामा परेका छन् । ग्यास विक्रेताले ग्यास लुकाउने गरेकाले कृतिम अभाव भएको पतौरा गम्हरिया निवासी पृथ्वी राय यादवको आरोप रहेको छ । ‘‘खुद्रा मूल्यमा बढी नाफा हुने भएकाले ग्यास लुकाउने गरेका छन्’’ उहाँले भन्नुभयो । गौरका ग्यास विक्रेताहरु ग्यास थोरैमात्रामा आउने गरेकाले उपभोक्तालाई मर्का परेको बताउँछन् । माग गरेअनुसार ग्यास कम्पनीले नदिएको आरोप उनीहरुको छ ।