पोखरिया–६ मा रहेको ज्ञानसागर इङ्लिस बोर्डिङ स्कुलमा नेपाली पढाउने शिक्षक विनोद मण्डलले बालकलाई निर्घात कुटपिट गरेको पीडितको भनाइ छ ।

गत सोमबार गृहकार्य गरेर ल्याउन दिएकामा गृहकार्य आफूले नगरी दिदीलाई गराउन लगाएको भन्दै शिक्षकले बालकलाई पिटेको बताइएको छ ।

कुटपिटबाट बालकको दायाँ तिघ्रामा चोट र ढाडमा समेत निलडाम छ । छोरालाई विद्यालय पढ्न पठाएको तर पशुलाई कुटेजस्तो पिटेको भन्दै अजयका बुबा रामदेव महथाले शिक्षकमाथि कारबाहीको माग गर्नुभयो ।

विद्यार्थीलाई कुटपिट गर्ने शिक्षक फरार भएका छन् । विद्यालयका प्रधानाध्यापक अरुणकुमार मण्डलले विद्यार्थी पिट्नु गलत भएको बताउनुभयो ।

विद्यार्थीमाथि भएको कुटपिटको चौतर्फी विरोध भएको छ । विद्यार्थी कुटपिटप्रति जिल्ला शिक्षा कार्यालय मोरङले पनि ध्यानाकर्षण भएको जनाएको छ ।

जिल्ला शिक्षा कार्यालयका विद्यालय निरीक्षक बलराम पराजुलीले सो घटनाको विषयमा छानबिन गरी पीडितलाई न्याय दिने बताउनुभयो ।