बाटो भुलेर चितवन निकुञ्जमा अलपत्र परेका दुई पर्यटकको उद्धार

रत्ननगर (चितवन), १७ माघ । पूर्वी चितवनको रत्ननगरस्थित सौराहा नजिकै चितवन निकुञ्जभित्र अलपत्र परेका दुई चिनियाँ नागरिकको सकुशल उद्धार गरिएको छ ।

निकुञ्जभित्र अपलत्र परेका उनीहरुलाई नेपाली सेना र प्रहरीले उद्धार गरेको हो । जिल्ला प्रहरी कार्यालय चितवनले आज दिएको जानकारीअनुसार निकुञ्जमा पैदल घुम्न गएका उनीहरु बाटो बिराएर प्रहरीलाई खबर गरेपछि शुक्रबार राति खोज्दै जाँदा फेला पारी उद्धार गरिएको हो ।

हात्ती प्रजनन केन्द्रबाट अन्दाजी तीन किलोमिटर उत्तरतर्फ निकुञ्जको देवरामघाट नजिकैबाट चीनियाँ नागरिक ईटु वेजी र गुजिया लियानको उद्धार गरिएको प्रहरीले जनाएको छ ।

वन्यजन्तुको आक्रमणबाट बच्न उनीहरु रुखमा चढेको अवस्थामा उद्धार गरिएको थियो । उनीहरुलाई खोज्न राति करिब तीन घन्टा लागेको प्रहरीले जनाएको छ ।