सडक दुर्घटनामा परी दुईको मृत्यु, तीन घाइते

इनेप्लिज २०७१ माघ १३ गते १६:०० मा प्रकाशित

accident-signइनरुवा, १३ माघ । पूर्व–पश्चिम लोकमार्गअन्तर्गत सुनसरीको इनरुवा इटहरी सडकखण्डअन्तर्गत तितिरवनामा आज दिउँसो ट्रकले कारलाई ठक्कर दिँदा दुई जनाको मृत्यु भएको छ भने तीन जना घाइते भएका छन् ।

पश्चिमबाट पूर्वतर्फ जाँदै गरेको बा६च ९५४ नम्बरको कारलाई को१ख १३८९ ट्रकले ठक्कर दिँदा कार चालक काठमाडौँ–२१ बस्ने श्याम महर्जन र मधेसका सुनिल मोचीको ज्यान गएको सुनसरीका प्रहरी उपरीक्षक मसउद आलम खाँले जानकारी दिनुभयो ।

ट्रकले कारलाई र कार पल्टेर साइकललाई ठक्कर दिँदा भएको दुर्घटनामा कार चालक महर्जन र मोचीको ज्यान गएको सुनसरी प्रहरीले जनाएको छ ।

सो घटनामा विक्रम विष्ट, सबुरलाल मोची गरी तीन जना घाइते भएका हुन् । ठक्कर दिने ट्रक पकली प्रहरीको नियन्त्रणमा रहेको छ । मृतक महर्जन दुर्घटनामा परी घाइते भएको र उपचार गर्ने क्रममा बिपी कोइराला स्वास्थ्य विज्ञान प्रतिष्ठान धरानमा मृत्यु भएको हो ।

मृतक मोचीको शव परीक्षणका लागि जिल्ला अस्पताल इनरुवामा ल्याइएको छ भने महर्जनको शव धरानमै रहेको सुनसरीका प्रहरी उपरीक्षक खाँले बताउनुभयो ।

प्रतिक्रिया