काठमाडौँ, ११ माघ । सूचना तथा सञ्चारमन्त्री डा मीनेन्द्र रिजालले सरकारकै कमजोरीका कारण कर्णालीको विकास हुन नसकेको बताउनुभएको छ ।

प्रेस काउन्सिल नेपाल र नेपाल पत्रकार महासङ्घद्वारा संयुक्त रुपमा आज यहाँ आयोजना गरिएको ‘कर्णालीको पत्रकारिता चुनौती र अवसर’ विषयक अन्तरक्रियामा उहाँले सरकारको दूरदर्शिता नहुँदा कर्णालीको विकासमा समस्या भएकाले अब नीतिगत रुपमै व्यवस्था गरेर अघि बढ्ने उल्लेख गर्नु भयो ।

मन्त्री रिजालले भन्नुभयो, “कर्णालीमा सम्भावना र चुनौती दुवै छ, त्यहाँको सम्भावनालाई केलाउन सरकारी सञ्चारमाध्यमका साथै निजी क्षेत्रले पनि हरसम्भव प्रयास गर्नुपर्छ ।”

नेपाल पत्रकार महासङ्घका केन्द्रीय सदस्य नवराज महताराले कर्णालीको पत्रकारिताको विगत र वर्तमान विषयक कार्यपत्र प्रस्तुत गर्दै अपाङ्ग सन्तानको रुपमा राज्यले कर्णालीलाई हेरेको हुनाले कर्णालीको समग्र विकास हुन नसकेको धारणा राख्नु भयो ।

राष्ट्रिय समाचार समिति अङ्ग्रेजी विभागका प्रमुख दीपराज सन्यालले कर्णालीमा शिक्षा, साक्षरता र पत्रकारिता शिक्षाको प्रवद्र्धन गर्न ‘सञ्चार प्रतिष्ठान’ को स्थापना गर्नुपर्ने आवश्यकता औंल्याउनुभयो ।

पत्रकार हरिदेवी रोकाया, जीतेन्द्र रोकायालगायत पत्रकारले कर्णालीको वास्तविक समस्या र सम्भावनाका समाचार लेख्नका लागि पत्रकारको दक्षता नै अभिवृद्धि गर्नु जरुरी छ भन्नुभयो ।