अध्यक्ष दाहाल र पूर्व प्रम थापाबीच भेटवार्ता

काठमाडौँ, १० माघ । एकीकृत नेकपा माओवादीका अध्यक्ष पुष्पकमल दाहाल र राष्ट्रिय प्रजातन्त्र पार्टीका पुर्व अध्यक्ष सूर्यबहादुर थापाबीच आज भेटवार्ता भएको छ ।

एमाओवादी अध्यक्ष दाहालको निवास लाजिम्पाटमा भएको भेटवार्तामा संविधानसभामा भएको अवरोध, दलहरुबीच रहेको अविश्वासको अवस्था र माघ ८ गते संविधान जारी हुन नसक्नाको कारणलगायतका विषयमा कुराकानी भएको थियो ।

दलहरुबीच रहेको अविश्वासकै कारण यही माघ ५ गते राति संविधानसभामा द्वन्द्व भएको र त्यसको पछाडि सबै राजनीतिक दलको उत्तिकै भूमिका रहेको भन्दै अब नयाँ कार्यतालिका तय गरेर संविधान निर्माणका लागि सबै मिलेर अगाडि बढ्नुपर्नेमा जोड दिइएको अध्यक्ष दाहालका सहयोगी शिव खकुरेलले जानकारी दिनुभयो ।

पूर्व प्रधानमन्त्री थापाले द्वन्द्व बढाएर होइन, प्रमुख दलहरुबीच आपसी विश्वासको वातावरण बनाएर नयाँ कार्यतालिका तय गर्दै अगाडि बढ्न अध्यक्ष दाहाललाई आग्रह गर्नुभएको थियो ।