शनिबार, कार्तिक ८ २०७७
काठमाडौं १४:२१
वासिङटन डिसी 04:36

संविधानसभामा नाराबाजी जारी

इनेप्लिज २०७१ माघ ८ गते ९:१५ मा प्रकाशित

ca-hause-1024x688काठमाडौँ, ८ माघ । निर्धारित समयभन्दा साढे दुई घन्टा ढिलो सुरु भएको संविधानसभाको आजको बैठकमा पनि नाराबाजी जारी छ ।

संविधानसभाको बैठक प्रारम्भ हुनासाथ एनेकपा माओवादी, मधेसी जनअधिकार फोरम नेपाल लोकतान्त्रिक, तराई–मधेस लोकतान्त्रिक पार्टी, मधेसी जनअधिकार फोरम नेपाल, सद्भावना पार्टी, सङ्घीय समाजवादी पार्टी नेपाल, तराई मधेस सद्भावना पार्टी नेपाल, राष्ट्रिय मधेस समाजवादी पार्टीलगायतका सभासद्ले नाराबाजीलाई निरन्तरता दिनुभएको हो ।

उहाँहरूले ‘संविधानसभालाई ब्यारेक बनाउन पाइँदैन, नियम मिच्न पाइँदैन’ लगायत नारा लगाइरहनुभएको छ । एनेकपा माओवादीका पुष्पकमल दाहाल, बाबुराम भट्टराईसहित ती दलका सभासद् पनि नाराबाजीमा व्यस्त हुनुहुन्छ ।

प्रारम्भमा चर्को सुनिँदै आएको नाराबाजी क्रमशः मधुरो हुँदै गएको छ । सभाध्यक्ष नेम्वाङका साथै संविधानसभा–व्यवस्थापिका संसद् सचिवालयका महासचिव एवम् अन्य कर्मचारी नाराबाजी रोकिएला र प्रक्रिया प्रारम्भ गरौंला भन्ने सोचका साथ आ–आफ्ना आसनबाट डगमगाउनुभएको छैन ।

संविधानसभाको आजको बैठकमा संविधान निर्माण प्रक्रिया अगाडि बढाउन प्रश्नावली गठनसम्बन्धी प्रस्ताव प्रस्तुत गर्ने कार्यक्रम छ । गत मङ्गलबारदेखि उक्त प्रस्ताव पेस गर्ने प्रयास भए पनि ती दलको निरन्तर अवरोधका कारण सफल हुन सकेको छैन ।

प्रतिक्रिया