एमाले संसदीय दल बैठकमा प्रक्रिया नरोक्ने निर्णय

इनेप्लिज २०७१ माघ ६ गते १३:५१ मा प्रकाशित

umlकाठमाडौँ, ६ माघ । नेकपा एमालेका को संसदीय दलको आजको बैठकले संविधानसभामा एमाओवादीका र आबद्ध मोर्चाका सभासद्हरुको अवरोधका कारण संविधान निर्माणको प्रक्रिया नरोकिने ठहर गरेको छ ।

पार्टी अध्यक्ष तथा संसदीय दलका नेता केपी शर्मा ओलीको अध्यक्षतामा आज संविधानसभा भवन नयाँबानेश्वरमा भएको बैठकपछि प्रमुख सचेतक अग्निप्रसाद खरेलले जारी गर्नुभएको प्रेस विज्ञप्तिमा सदनमा भइरहेको अवरोधलाई ‘कायरतापूर्ण र अराजक काम कारबाही’ को सङ्ज्ञा दिँदै संविधान निर्माणको प्रक्रियामा दृढ रहन सम्पूर्ण लोकतान्त्रिक र देशभक्त दल, सभासद् र जनतामा आब्हान पनि गरिएको छ ।

एमालेले एमाओवादी र आबद्ध मोर्चाका सभासद्को प्रदर्शनलाई अराजक, अशोभनीय, अमर्यादित, लोकतन्त्रविरोधी र नेपालको स्वाभिमान एवं अस्मितामाथिको प्रहार भनी आलोचना गरेको छ ।

एमालेको आजै बसेको स्थायी कमिटीको बैठकले पनि संविधानसभामा आज बिहान भएको तोडफोडको कडा निन्दा गर्दै दोषीलाई कारवाही गर्न र दोषीबाटै क्षतिपूर्ति भराउन माग गर्ने निर्णय गरेको थियो ।

प्रतिक्रिया