अमेरिकी अध्यागमन तथा भन्सार प्रवर्तन (आईसिइ ) ले राष्ट्रपति डोनाल्ड ट्रम्पको दोस्रो कार्यकालको पहिलो महिनामा २०,००० भन्दा बढी अवैध आप्रवासीहरूलाई पक्राउ गरेको छ। यो संख्या गत वर्षको सोही अवधिको तुलनामा ६२७% वृद्धि भएको छ ।

यद्यपि, पक्राउ परेका व्यक्तिहरूको निर्वासनको संख्या सोही अनुपातमा बढेको छैन। जनवरी २०२५ मा करिब ३७,६६० व्यक्तिहरूलाई निर्वासित गरिएको थियो, जुन राष्ट्रपति जो बाइडेनको अन्तिम कार्यकालको औसत मासिक ५७,००० भन्दा कम हो।

प्रशासनले १४ वर्षभन्दा माथिका सबै अवैध आप्रवासीहरूको औंठाछाप तथा ठेगाना दर्ता गर्नुपर्ने नीति ल्याएको छ, जसले व्यापक निर्वासन प्रक्रियालाई छिटो बनाउन मद्दत गर्ने विश्वास गरिएको छ।

दर्ता नगरेको खण्डमा $५,००० सम्मको जरिवाना वा ६ महिनासम्मको जेल सजाय हुन सक्ने छ ।

यी कठोर प्रवर्तन गतिविधिले आप्रवासी समुदायहरूमा ठूलो डर तथा चिन्ता बढाएको छ, विशेष गरी विद्यालयहरू लगायतका विभिन्न स्थानहरूमा आईसिइका गतिविधिहरू बढेको प्रतिवेदनहरू सार्वजनिक भएका छन्।

ट्रम्प प्रशासनले दावी गरेअनुसार यी कारबाहीहरू मुख्य रूपमा आपराधिक इतिहास भएका आप्रवासीहरूलाई लक्षित गरिएको हो। तर तथ्यांकहरूका अनुसार पक्राउ परेका धेरै व्यक्तिहरूको कुनै आपराधिक अभिलेख नभएको पत्रपत्रिकाले लेखेका छन् । निर्वासन दर अपेक्षित रूपमा नबढेपछि राष्ट्रपति ट्रम्पले आइसिइ Iभित्र नेतृत्व परिवर्तन गरेका छन् ।