१०० भन्दा बढी किशोरकिशोरीहरूले भरिएको उपनगरीय एटलान्टा पारिवारिक भोज समारोहमा गोली चल्दा २ जनाको मृत्यु भएको छ भने कम्तिमा ६ जना घाइते भएको प्रहरी अधिकारीहरुले बताएका छन् ।

राति ११ बजेतिर गोली चलेको थियो । डग्लस काउन्टी शेरिफको कार्यालयका अनुसार एटलान्टाबाट करिब २० माईल पश्चिममा डग्लसभिलको एउटा घरमा उक्त गोलीकाण्ड भएको हो ।

“हामीलाई थाहा छ कि त्यहाँ स्थित एक घरमा भोज थियो जहाँ एक सय भन्दा बढी किशोरकिशोरीहरू उपस्थित थिए। झडप भयो जसको परिणामस्वरूप बन्दुकको गोली लागेर दुई जनाको मृत्यु भयो र छ जना घाइते भए,” शेरिफको कार्यालयले आइतवार एक विज्ञप्तिमा उल्लेख गरेको छ ।

गिरफ्तार गरिएको जानकारी गराईएको छैन भने अनुसन्धान जारी रहेको बताईएको छ । शेरिफका अन्वेषकहरूले घटनाको बारेमा जानकारी भएका जो कोहीलाई उनीहरूलाई सम्पर्क गर्न आग्रह गरिरहेका छन्।

मारिएका दुई जनाको नाम सार्वजनिक गरिएको छैन तर भोजमा सहभागी किशोर /किशोरीका अभिभावकले मृतक किशोर/किशोरी भएको लेखेका छन् ।

“मेरो बच्चा आघातमा परेको छ। उनका साथीहरू आघातमा परेका छन्। म आघातमा परेको छु,” भोजमा जाने एकजनाका अभिभावकले सामाजिक संजाल (फेसबुक)मा लेखे।