विराटनगर,९ भदौ ।

प्रदेश नं १ प्रहरी तालीम केन्द्र विराटनगरबाट १३९ औं समूहका ७१४ प्रहरी जवानहरुले आधारभुत तालीम सम्पन्न गरि आज दीक्षित भएका छन् ।

यसरी दीक्षित हुन प्रहरी जवानहरुमा १५४ महिला र ५६० पुरुषले २३४ दिन तालीममा सहभागी भएका थिए ।

तालीममा सहभागी प्रहरी जवानहरुलाई नेपाल, नेपाली प्रहरी संगठन परिचय, सुरक्षा, प्रहरी कार्यालय, अपराध नियन्त्रण, अपराध अनुसन्धान, विद्यमान कानून र प्रहरी युक्ति तथा कारवाही लगायतका विषयहरुमा प्रशिक्षण दिइएको थियो ।

यसैगरी उनीहरुलाई चाँदमारी, कवाजका साथै डेमोष्ट्रेशन, स्थलगत भ्रमणका साथै विभिन्न अतिरिक्त क्रियाकलापहरु गराई सामूहिक भावनाको माध्यमवाट व्यवहारिक ज्ञान र सीप प्रदान गरिएको थियो ।

प्रदेश नं १ प्रहरी कार्यालयका प्रमुख प्रहरी नायव महानिरीक्षक सुदिप गिरीले दीक्षित प्रहरीलाई दज्र्यानी चिन्ह लगाउदै नागरिक मैत्री भएर व्यवसायीक कुसलताका साथै नागरिकको जीउधनको सुरक्षा र अपराध नियन्त्रणमा लाग्न निर्देशन दिनु भयो ।

उहाँले आगामी निर्वाचन शान्तिपूर्ण र भय रहित बातावरणमा सम्पन्न गर्न नागरिकको सहयोगमा सुरक्षामा सुदृढ गर्न निर्देशन दिनु भयो ।

दीक्षान्त समारोहमा समादेशक प्रहरी वरिष्ठ उपरीक्षक राजेशनाथ बाँस्तोला र सह समादेशकबाट चर्तुभुज ओझाबाट प्रशिक्षार्थी प्रहरीहरुलाई सपथ ग्रहण र तालीम प्रतिवेशन प्रस्तुत गरिएको थियो ।

प्रदेश प्रहरी प्रमुख गिरीले तालीममा सर्वप्रथम हुने अच्युतराज राई र कवाज एवं महिलातर्फ प्रथम मेघा लिम्वु पुरस्कार र प्रशंसापत्र प्रदान गर्नु भयो ।

यसैगरी उहाँले तालीम द्धितीय प्रमिस राई, तृतीय सुजन ढकाल, अध्ययन प्रथम रुकेश भगत, शारीरिक व्यायाम प्रथम समीरकुमार राई, चाँदमारीमा प्रथम दर्शन दामिलङ , प्रहरी युक्ति तथा कारवाहीमा सुरजकुमार खसाव लगायत प्रशिक्षकलाई प्रशंसा पत्र प्रदान गर्नु भयो ।

सो अवसरमा प्रशिक्षार्थी प्रहरीहरुले विभिन्न नृत्य र खेल प्रदर्शन गरेका थिए ।